Aizawl-ah Ruihhlo Do Kawng Zawhpui neih a ni

Working Committee on Ruihhlo Do buatsaihin nimin khan Aizawl khawpui ah ‘Ruihhlo Do Kawng Zawhpui’ neih a ni a, he hun hi Social Welfare & Tribal Affairs Minister leh Working Committee on Ruihhlo Do-a Chairman Er. Lalrinawma chuan khuallian niin a hmanpui a ni.

Ruihhlo Do Kawng Zawhpui hi thuang hniha neih niin, Millenium Centre kawt leh Sikulpuikawn atangin chawhnu dar 12:45-ah program neihna hmun tur Raj Bhava Northern Gate pan-a neih a ni a. Ruihhlo chu kan ram hmelma a nih thu leh ruihhlo tel lova kan hlim theih thu te, ruihhlo zuartute chu ram leh hnam hmelma an nih thu leh ruihhlo tel lova ram nuam siam tura tanrual a pawimawh thute bakah, ruihhlo man chhuahna kawngah Sawrkar tawiawm zel a pawimawh thute an auchhuahpui a. Ruihhlo leh a kaihhnawih laka inhnamhnawih lo tur leh ruihhlo do kawnga theihtawp chhuah turin thutiam an la nghal bawk a ni.

Ruihhlo Do Kawng Zawhpui puala Raj Bhavan Northern Gate-a hun hmanah Social Welfare & Tribal Affairs Minister Er. Lalrinawma chuan Ruihhlo Do Kawng Zawhpui buatsaiha thalai tam tak an tel thei leh ruihhlo do kawnga hmalakna in thlawpna tha tak a dawng chu ropui a tih thu sawiin, hemi tihlawhtling tura penchhuak zawng zawngte fakawm a tih thu a sawi a. Ruihhlo in min run mek karah Sawrkarin theihtawp a chhuah a, State, District leh Village Level thlenga awmze nei zawka hmalak a nih theih nan ruahmanna siam mek zel a nih thu a sawi a; mipuite chu kan ram leh hnam chhanna tur a ni tih hriaa a hlawhtlin theih nana tanpuitu leh tawiawmtu nih tum theuh turin a sawm a ni.

Excise & Narcotics Department changtu Minister ni bawk Er. Lalrinawma chuan ruihhlo leh a kaihhnawihte do kawngah Sawrkar leh YMA bakah NGO dang leh Kohhran te'n theihtawp an chhuah thin chu lawmawm a tih thu pawh sawiin, thahnemngai taka ke pen chhunzawm zel turin a chah a. Nunna hlu tak chhan nan ruihhlo dolet a tul thu sawiin, “Pathian in taksa tha tak min pek hi ruihhlo leh a kaihhnawih lakah kan venghim tur a ni,” a ti. Kalkhawmte chu mi ai baka nawm tumna thlahlel lo tur leh kan nawm theih dan tur bera Pathian in min siam dan leh hemi mila ruahmanna a siamte zah thiam turin a chah a. Mipuite chu ruihhlo do hna chu Sawrkar Department chanah dah bik mai lova, kan zavaia mawhphurhna a ni tih hriaa theihtawp chhuaha tanrualpuiah a sawm nghal bawk.

He hun hman hi Social Welfare & Tribal Affairs Department a Joint Director C. Zodinpuii chuan kaihruaiin Central YMA President leh Core Committee on Ruihhlo Do-a Vice Chairman R. Lalngheta chuan inlawmna thu sawiin, Zirlai pawl hruaitute pawhin thu an sawi a. He hunah hian Aizawl khawpui chhunga Zirlai thahnem tak telin ruihhlo dona thuziak hrang hrang an keng bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man