Grand Gandhi Jayanti Exhibition zawhfel a ni

Ni thum chhung awh ‘Grand Gandhi Jayanti Exhibition’ chu nimin khan zawhfel niin a kharna inkhawm nimin-a neih chu Governor Dr. Hari Babu Kambhampati chuan a hmanpui a ni.

Raj Bhavan Circular Lawn-a Exhibition kharna ah hian Governor chuan Exhibition hlawhtlinng taka neih a nih theihna tura thawktute chungah lawmthu sawiin, he Exhibition hian kut hnathawh leh an thil siam te hlutsak kan inzirtirna kawngah awmzia a neih a beisei tih a sawi a. He Exhibition a tel, thil zuartute leh Exhibition hlutsaktute chungah lawmthu a sawi bawk. Governor chuan he hunpui buatsaih a nih theihna tura tanpuina sum thawhtu Ministry of Textiles, Government of India leh a huaihawttu Commerce & Industries Department chungah lawmthu a sawi bawk.

He huna tarlan a nih danin he Exhibition hi a hlawhtling thawkhat viau a, an thil hralhna atangin cheng nuai 30 vel hmuh a ni a, Sum hlawm tam zawk hi Handloom & Handicrafts atanga hmuh niin  Exhibition chhimtu zingah sumdawnna atan bultanna sum chungchang zawhfiah tum mi 860 in MRB dawhkan-a duty te an dawr a. Puantahmi 500 chuangin Puantah software siam, ‘Zopuan’ chungchangah Science & Technology Department dawkan an dawr bawk.