YMA in chibing/Sakhaw bing puala Candidate siam lo turin Political party leh mipuite an ngen
Central YMA chuan India ram puma entawn tlak Inthlanna felfai leh muanawm tak kan neih leh ngei theihna turin inthlan thuchah tichhuakin, “He inthlan thuchah hi ngai pawimawh a, zawm ngei turin Mizoram mipuite leh Political party tinte kan ngen a ni,” an ti a. He thuchhuah an siama Point 10 an tarlan zingah Mizo hnahthlak zingah chibing/Kohhran bil inthliar hrang zawnga chetna chu Central YMA chuan tha a ti lo tih tarlangin, “Kan hmaa Inthlanna kan neih turah pawh chutiang zawnga hma la lo tur leh chibing/Sakhaw bing puala Candidate siam lo turin Political party leh mipuite kan ngen a ni,” an ti a. Kan ram rorelna hi mipui siam a nih thu leh a chhiat a thatah mawhphurtu kan ni tih hriain, khua leh tui dik takte chu vote thlak theuh turin an ngen bawk.
Political party hrang hrangte leh Party Official Candidate ten khawtlang huapa ruai siam chu Central YMA chuan tha ti lovin, tumahin hetiang zawnga khawtlang huapa ruai siam lo turin an ngen a. Aurinna hman chungchangah political party tin ten Sawrkar-in a phal dan ang bak leh khawtlang tana ninawm leh hnawksak thei tur ang chi chu tih loh hram ni se an ti. Candidate te chu ram hruaitu turte an nih avangin zu ruih hmang te, eiruk chingte leh nungchang thlahdahte an lo awm palh a nih pawhin vote loh ngam nise an ti a, Naupang kumtling lo leh thil kalphung hre pha lo te chu inthlan boruaka hnuhluh loh leh hmanrua a hman loh nise tiin Party manifesto-ah a taka tihhlawhtlin theih ngei tur chauh tarlan nise an ti bawk.
Heng bakah hian Inthlanna muanawm, boruak tha tak hnuaia kan neih theihna turin thlangtu mipuite leh mawhphurtu zawng zawngte theihtawp chhuaha tan la turin Central YMA chuan an ngen bawk a, Hmanraw thianghlim lo chelekna reng reng chu an duh loh thu pawh sawiin, “Mitin in an chhia leh tha hriatna thiang leh zalen tak hmanga vote an thlak theih nan sum leh therhlo dang hmanga vote lei leh hralh hi tih loh nise, mipui, pawl hrang hrang leh Kohhrante pawhin party leh candidate-te sum leh thildang dil loh nise,” an ti a. Social Media hrang hrangah thubelhchian dawl lo leh finfiahna awm lo ang chi, party hamthatna atana thehdarh loh ni se an ti bawk.
Central YMA chuan Inthlanpui thuchah Central YMA in a chhuah thin te an ngaih pawimawh sak avang leh an zah der sak thin avangin Mizoram mipuite leh Political Party te chungah lawmthu an sawi thu he an thuchhuah ah hian an tarlang bawk a ni.
Comments
Post a Comment