Tomato ching thar turte tan Training buatsaih sak

KVK Serchhip District leh East Lungdar Block Horticulture Offier (BHO) Office te tangkawp chuan East Lungdar RD Block huamchhunga awm Sihdarh zau-a Tomato ching thar turte tan tunkar Thawhtanni khan Training an buatsaih.
KVK Training Hall, North Vanlaiphai-a he training buatsaih hi KVK-a Senior Scientist & Head Dr. T. Vanlalngurzauva chuan kaihruaiin KVK kalphung leh hnathawh dan kalphung tlangpui a hrilhfiah a. E. Lungdar Block a Block Horticulture Officer Biakhmingthanga chuan Tomato ching thar turte tana Horticulture Department-in hma a laksak dan sawiin, hlawkpui khawpa training an neih ngei a beisei thu leh chumi atana KVK mithiam te thusawi chu ngai pawimawh turin a chah bawk a ni.

He hunah hian KVK North Vanlaiphai atangin Dr. Rohit Shukla, Subject Matter Specialist (Horticulture) chuan kalkhawmte zirtirna pein Tomato chin dan leh enkawl dan hrang hrang a lem nen a entir a, kuthnathawktute nen Tomato chin dana pawimawh chi hrang hrang sawihona hun hman zui a ni bawk. Training Hall-a hun hman zawh a nih hnu hian KVK Serchhip District, N. Vanlaiphai ten Tomato an chinna hmun Greenhouse tlawhpuiin Tomato enkawl dan a takin an entir bawk a ni.