State Level EMRS Cultural & Literary Fest neih a ni

Mizoram State Level EMRS Cultural & Literary Fest 2023 chu nimin khan neih tan niin Vawiin hian chhunzawma zawhfel a ni ang.

Ni 2 chhung awh tur Sawrkar laipui Ministry of Social Welfare & Tribal Affairs hnuaia National Education Society for Tribal Students (NESTS), Mizoram Eklavya Model Residential School (EMRS) Society leh Social Welfare & Tribal Affairs (SW&TA) Department, Mizoram te tangkawp buatsaih, 2nd Mizoram State Level EMRS Cultural & Literary Fest 2023 hi MZU Multipurpose Hall-ah SW&TA Minister Er. Lalrinawma chuan hawngin Mizoram-a EMRS hrang hrang 6 te tana Cultural & Literary Fest 2023 buatsaih a ni chu lawmawm a tih thu leh rah tha a chhuah ngei a beisei thu a sawi a. Thu leh hlain thil a tih theih thu leh mi ngaihtuahna chena a thlak hlawk theih thu sawiin, thu leh hla avangin indona leh inremna Mizo history-ah ngei pawh hmuh tur a awm a ni, a ti. Kalkhawmte chu hnam nunphung leh ziarangte zahpui lova chawinung zel tura chahin, hnam ziarang leh nunphung hloh chu hnam bo zia a nih thu a sawi a. “Kan hnam zia humhim hna hi midang kut-a awm ni lovin keimahni ngei mawhphurhna a ni,” a ti bawk.

Mizoram State Level EMRS Cultural & Literary Fest 2023 hi September ni 7-8, 2023 chhunga neih tur niin, Cultural leh Literary item hrang hrang hmangin intihsiakna neih a ni dawn a. He hunah hian Mizoram a EMRS 6 atangin zirlai leh zirtirtu 150 an tel a ni. Nimin khan Literary Fest neih niin, Vawiin-ah Cultural Fest neih chhunzawm a ni anga, nimin a hun hman hi AMC Corporator David Zohmangaiha khual khual zahawm niin a hmanpui bawk a ni.

Social Welfare & Tribal Affairs Department tarlan danin Mizoram EMRS hmasa ber chu kum 2008-ah Lunglei Pukpui-ah din niin, kum 2015 khan Serchhip-ah din a ni leh a, kum 2020 atangin Lawngtlai, Chawngte, Tuipang leh Ngopa-ah te din leh niin tun dinhmunah EMRS kalpui mek 6 a awm a. Kum 2023-2024 Academic Session-ah hian EMRS 6 ah te hian zirlai 1,210 an awm mek a ni. EMRS Lunglei leh Serchhip-ah te Class XII thleng zir theih niin, a dang 4 ah te hian Class X thleng zir theih a ni a. Tih changtlun leh tul angte bawhzui kawngah dan anga hmalak zel a ni.

Mizoram EMRS Society hi kum 2020-ah din niin, tun dinhmunah Mizoram-ah Eklavya Model Residential School (EMRS) sak mek 5, Noaotla (Niawhtlang), Tlangnuam, Tlungvel, Bilkhawthlir leh Zawlnuam-ah te a awm a. Heng bakah hian EMRS din tura sanction hmuh tawh, buaipui tul dangte tihfel veleha sak mai theih 6, Khawbung, Khawzawl, Sawleng, Thiltlang, Lungsen leh West Phaileng-ah te a awm bawk.