C&I hnuaia Family Oriented SEDP dawng turte enfiah

Mizoram sawrkar in Family-Oriented SEDP Phase 2 a kalpui mekah Serchhip District-a Commerce & Industry Department chuan an Department hnuaia 2nd Phase 1st Instalment dawng turte enfiah hna nimin khan an thawk tan.
Serchhip-a Industry Department hian nimin khan Serchhip leh Hrangturzo Bial-a an beneficiary te enfiah hna hi thawkin Serchhip khawpui chhunga mi te chu Serchhip P&E Veng YMA Hall-ah kokhawmin District Industry Centre, Serchhip-a District Commerce & Industries Officer F. Lalsawmliana chuan fuihna thu a sawi a. An Department hnuaia tanpuina dawng turte chu hotu sang zawk atanga List an dawn anga kalpui a nih thu sawiin, Department in tih danglam leh thlak an nei lo tih a sawi a. Tanpuina dawngtu turte chu tanpuina an dawn chhan ang ngeia tha tak leh tangkai taka hmang turin a chah bawk a ni.

Commerce & Industries Department hian Serchhip District pumah Family Oriented SEDP Phase 2 hnuaiah hian beneficiary 833 an nei a, nimin khan Serchhip-a mi 196 te kohkhawm niin Hrangturzo bial khaw hrang hrangte pawh thawktute chuan khaw tinah kal chilhin an Bank Account enfiah hna hi an thawk a. Ruahman lawk ang chuan Vawiin hian Thenzawl-ah chhunzawmin Bungpui leh Neihloh khua te pawh enfiah nghal a ni anga. Karleh ah Tuikum bial atanga dawng turte enfiah leh tur niin tun thla ni 15 hmain zawhfel vek tura ruahman a ni.