Serchhip Teachers' Association (STA) Golden Jubilee lawmna neih a ni
STA Golden Jubilee lawmna atana Monument siam, Serchhip DEO Complex a mi chu nimin chawhma lam khan STA President VL. Chanchinthahrilmawia chuan hawngin hemi hnu chawhnu lamah STA Golden Jubilee lawmna hi Govt. Higher Secondary School Hall, Serchhip-ah neih zui a ni a, he hun hi STA Member lo ni tawh leh Mizoram sawrkar-a Sports & Youth Affairs Board Vice Chairman TC. Pachhunga chuan khuallian nia hmanpuiin STA in kum 50 a lo tling ta chu lawmawm a tih thu a sawi a. Amah pawh Serchhip khua, Govt. Serchhip College-a BA Batch hmasa ber a nih thu leh JM H/S a lo din khan Headmaster hmasa ber niin kum 1982-1984 chhung a thawh hnuah kum 1984 khan Zirtirtu hna bansanin Politics a luhchilh tak thu a sawi a. STA dinchampha chu Zirtirtu Ni a ni bawk tih pawh sawiin, Zirtirtu chu mihring engmah ni lo puitling a siamtu an nih thu leh anmahni puala Ni bik an nei chu mipui ten an thawhrimna an hriatpuina leh an chawimawina ni a ni tih a sawi a, Zirtirtu kalkhawm te chu zahna chibai a buk bawk.
Khuallian chuan STA hmalakna hrang hrangte tarlangin, Zirtirtu te kara thawhhona tha a awm theihna tur leh indawmkan tlanna tura an hmalakna te chu tha a tih thu a sawi a. Zirtirtu te chu mitin ten an ngaihsan leh an nunphung pawh an en bik an ni tih in hre reng turin a chah a. Sawrkar hna sang zawk thawk tura exam result chhuak ah Serchhip khaw mi an tlem thin thu pawh sawiin, hemi kawngah hian Zirtirtute pawhin an zirlai te zingah tan an lak a pawimawh thu te a sawi bawk.
STA Golden Jubilee lawmna hun hi an pawl Vice President Samuel Saithuamliana chuan kaihhruaiin an President VL. Chanchinthahrilmawia chuan inlawmna thu a sawi bawk a. Report atanga a lan danin Serchhip Teachers' Association hi September 5, 1973 khan din niin Serchhip-a Primary School atanga College thlengin zirna In, sawrkar enkawl leh Private School a thawk, a nghet leh nghet lo a thawk te pawh tel theih a ni a, tunah hian Members 184 awm mekin Serchhip-a zirna In zingah STA a tel lo hi an awm bawk. Nimin a Golden Jubilee an lawmna ah hian an hruaitu hlui lo ni tawh hnenah chawimawina thilpek an hlan bakah an Member Pension a chhuak mi 6 te thlahna thilpek an hlan nghal bawk.
Comments
Post a Comment