SEDP sem turin buaipui mek

Family Oriented SEDP 2nd Phase tanpuina sem turin Serchhip District-a Line Department hrang hrang ten chak takin hma an la mek zel a, Agriculture Department chuan an Department hnuaia beneficiary te tanpuina sem turin Bank-ah Cheque an thehlut fel tawh a, Bank lamin an remchan hun ah Account-ah an rawn thun tur thu an sawi a ni. Agriculture Department hnuaiah hian Serchhip District pumah beneficiary 222 an awm a, heng mite hnenah hian 1st Instalment Rs. 55,50,000/- semchhuah a ni dawn a ni.

Hetihlai hian Horticulture Department chuan tunah hian SEDP tanpuina sem tur sum hi an dawn tawh thu sawiin, APR sign tawh leh Bank Account enfiah tawh te chu tunkar hian tanpuina pekchhuah hman an beisei tih an sawi a. Industry Department chuan nimin atang khan Tuikum bial-a khaw hrang hrang tlawhin an Department hnuaia tanpuina dawng turte Bank Account an enfiah bakah APR-ah hming an ziah tir bawk. Heng bakah hian Department dang te pawhin thil tul ang te an buaipui mek thu an sawi bawk.