Police te chu rilru leh taksa hrisel nei reng tura ngaih an ni - Chief Minister

Chief Minister Zoramthanga chuan Police te chu rilru leh taksa hrisel nei reng tura ngaih an ni tih a sawi.

XXI Mizoram Police Sports Meet, 2023 hawnna hun nimin-a Rajiv Gandhi Stadium, Mualpui-a neih khuallian nia a hmanpuina ah Chief Minister Zoramthanga chuan Mizoram Police Sports Meet chu Police te tana taksa leh rilru intuaihriamna hun pawimawh a nih thu leh Police te chu rilru leh taksa hrisel nei reng tura ngaih an nih thu a sawi a. Taksa leh rilru a hrisel that loh chuan kan hnathawhna lama a tibahlah thin tih sawiin, tunlaiah ruihtheihthil in kan thalaite a tibuai nasain, kan Police thenkhatte ngei pawh a tihbuai zingah an tel hial ang tih a sawi a, heng thil thalo lakah hian hnehtu nih tum tlat turin a ngen bawk a ni.

Tunhnaia buaina leh harsatna chi hrang hrang lo awm thin lakah Police ten chhuanawm takin hna an thawk thin tih pawh Chief Minister chuan sawiin, “Ralthuam tawlhrukna te, Drugs tawlhrukna te leh Smuggling chi hrang hrangin min chim a, heng thil tha lo che vel te laka huaisen taka in hmalakna hi kan chhuang hle a ni,” a ti a. “In ngaihtuahna te fim taka hmangin huaisen a hunah huaisen takin, dawhtheih a hunah dawhthei takin, zaidam a hunah zaidam takin; ram dang mite tana entawn tlak Police tha ni zel turin ka ngen che u a ni,” a ti. Chief Minister chuan kan thenawm ram te ah buaina a awm avangin mi tam tak an rawn raltlan tih kan hriat thu pawh sawiin, “Ram ralmuang tak kan nih hlutzia hi hrerengin Mizoram hi remna leh muanna entirtu ram, State entawn tlaka awmtir zel turin i thawk ang u,” tiin a sawm bawk a ni.

He hunah hian Mizoram DGP Anil Shukla IPS pawhin Mizoram Police ten Sports huang ah India ram huapin hlawhtlinna an lo chang fo tawh tih sawiin, tunhnaia India ram State Police zawng zawng inelna 71st BN Mullick Memorial Football Championship, Srinagar, J&K-a buatsaih ah pawh Mizoram Police chu an champion tih a sawi a. Police ten tha taka an hna an thawh theih nan rilru leh taksa hrisel an neih a tul avangin Sports chu Police te thuamthatna pawimawh tak pakhat a nih thu a tarlang bawk a ni.

Mizoram Police Sports Meet hi kum 1987 atang khan rokhawlhna a awm loh chuan kumtin buatsaih thin niin kumin hi a tum 21-na a ni a, XXI Mizoram Police Sports Meet-ah hian Police te chu Contingent 12-ah inthenin Discipline 18-ah inelna an nei dawn a, Police infiammi 1107 an ten intihsiakna hi neiin tun thla ni 22 khian zawhfel tur a ni ang.

Comments

Popular News (Last 30 Days)

Vawiin-ah HSSLC Exam result

LPG man bithliah thar