National Integration Tour (NIT)-a kal turte vailiam

Lakhimpur Battalion, 2 Assam Rifles buatsaiha National Integration Tour (NIT) 2023-a kal turte chu nimin khan Aizawl atangin Tourism Minister Rober Romawia Royte chuan a vailiam.

Hnam inpumkhatna chawinunna tura ruahman, National Integration Tour (NIT) 2023-ah hian Mizoram Journalist Association (MJA) Member 8, Zirtirtu 2 leh anmahni hruaitu turte kalin Gajraj Hall, 2 Assam Rifles tualzawl-a heng mi te vailiamna hunah hian Tourism Minister chuan National Integration Tour thil tum ropui a tih thu leh tun dinhmun ngaihtuaha hnam inpumkhatna lam hawi program buatsaih a ni chu finthlak a tih thu a sawi a. Assam Rifles-te hmalakna chhuanawm a tih thu leh Mizo hnam ziarang leh nunphung mawi tak takte midangte zirtira lantirtu nih tum tur leh hnam inpumkhatna kawnga Mizoram Sawrkar leh Assam Rifles hmalaknate bakah Mizoram Tourism chungchang tarlangtu nih tum turin a chah nghal bawk.

National Integration Tour 2023-a kalte hian nimin khan Mizoram chhuahsanin Assam an pan a. An cham chhung hian Assam, Arunachal Pradesh leh Meghalaya State-a hmunhma pawimawh hrang hrangte an tlawh dawn a. Ruahman dan chuan September ni 26, 2023-ah Mizoram an rawn thleng leh dawn a ni.