NLUP hnuia pawisa puk tir rulh that loh ngai thu tak

Mizoram Assembly hnuaia Public Accounts Committee (PAC) chuan NLUP hnuaia Department thenkhatin a pung awm lova pawisa an puktir rulh that loh lutuk chu a ngai thu tak hle.

Tunhnaia PAC Chairman Vanlalhlana’n Assembly a report a thehluhah chuan NLUP hnuaia cheng nuai 511 chuan pung awm lova puktute rul thuai tura na taka nawr a nih thu a tarlang a. Congress sawrkarin mipui hmasawnna atana a Flagship Programme NLUP hnuaiah February 2011 leh March 2014 inkar chhung khan cheng nuai 646 chuang a pung awm lovin mimal leh pawl 30 hnenah pawisa puktir a ni a. An dahkham atan LSC pawmsak an ni. Pawisa hi March 2012 leh September 2017 inkara rulh vek tur a ni a, an rulh that loh chuan an LSC sawrkar hnena thehlut tura tih an ni a. Chuti chungin tun thlengin nuai 511 rulh loh a la awm a, rulh tawh hi cheng nuai 94 vel chauh a la ni.

NLUP Implementing Board hnuaia pawisa puk zingah Horticulture Department-in an thing chhuak tam ber a. Thlai tiak siam leh hralhna tur (nursery) dintu mi 8 hnenah cheng nuai 100 pekchhuah a ni a, chumi atang chuan cheng nuai 84 rulh a ni tawh a, rulh loh cheng nuai 16 chu la rulh loh a ni. Animal Husbandry and Veterinary Department atangin mi 16 hnenah vawkpui vulha a note lei tur ruahmanna (Piglet Multiplication Centre) dinna atan cheng nuai 158 pekchhuah a ni a. Heta tang hian Rs. 4,23,000 chauh an la rul a, cheng nuai 154 chu rulh loh a la ni a. Department lam chuan kum 2013, 2016 leh 2018-ah PRRS vawk pulhri a len avangin pawisa puktute hian an rul tha hlei thei lo niin an sawi.

  NLUP Implementation Board chuan mi/pawl 5 hnenah a pung awm lo loan hi cheng nuai 377 a pechhuak a. Tun thleng hian cheng nuai 36 chauh an la rul a, rulh loh hi cheng nuai 342 zet a la awm a. Pawisa puktu zingah hian Hnamchhantu Pawl in cheng nuai 230 chuang an puk a, Samuel Tea Factory, Biate chuan Rs. 57,77,000 pukin anni chiah hian loan hi tlem a zawng an rul a, a dang 3 chuan tun thlengin engmah an la rul lo. Hnamchhantu pawl hian cheng nuai 35 an rul tawh a, Samuel Tea Factory hian cheng nuai khat an rul tawh bawk. PAC chuan an report-ah pung awm lo pawisa puktute’n an rulh kim vek theihna atana tha thawh turin a puktirtu Department-te na takin a hriattir a ni.