MPTA in zirlai chhawmdawlna an sem

Mizoram Primary Teachers Association (MPTA) chuan nimin khan Zirlaite chhawmdawlna semin he hun hi School Education Minister Lalchhandama Ralte chuan a hmanpui a ni.

Zarkawt Community Hall-a he hun hmanna ah hian Education Minister chuan MPTA ten zirlai harsate chhawmdawlna an sem chu ropui a tih thu sawiin, midangte tana malsawmna nih aia hlu hi mihring dam chhanah a awm lo tih a sawi a, uar lehzuala kalpui zel turin a fuih bawk.

Nimin-a Endowment Fund semna hun hi an pawl President R. Zonunmawia chuan kaihruaiin Students Endowment Fund dawng tur hian MPTA chuan zirlai naupang harsa mi 36 a thlangchhuak a ni. He chhawmdawlna dawngtute hi pawisafai Rs. 5000/- bakah T-Shirt, Kekawr leh Lukhum pek an ni a, anmah hruaitu an chhungte nen an kal lam leh haw lam senso tur pek vek an ni bawk a ni.