Health Centre-a kalpui tur Energy for Health hawn a ni

Mizoram-a Health Centre 300 chuanga Solar Energy hmanga kawlphetha pechhuak tura hmalakna 'Energy for Health' chu nimin khan Health Minister Dr. R. Lalthangliana chuan Zemabawk Urban Primary Health Centre-ah a hawng.

SELCO Foundation, Mizoram leh Health & Family Welfare Department chuan 'Energy for Health' atana thawhhona thuthluang Memorandum of Understanding (MoU) an lo ziah tawh angin he program kaltlang hian ramchhunga Health Centre 300 chuang zet chu Solar hmangin kawlphetha leh Eng pek tum an ni a. Hei hian Mizoram-a PHC zawng zawng leh Sub-Centre thenkhat a tuam anga. PHC pakhat atana sum hman tur hi cheng nuai 7 atanga nuai 8 niin, Sub-Center pakhat Solarise na tur chu cheng nuai 3 atanga nuai 4 ni tura ruahman a ni.

He hunah hian Health Minister Dr. R. Lalthangliana chuan kumin 2023 ralhma ngeia Mizorama Health Centre 300 chuangah ni zung chakna hmanga hnathawhna atana an mamawh power pechhuak tura hma an la tur chu lawmawm a tih thu sawiin, Energy for Health hmalakna hi PHC leh Sub-Centre hrang hrang, kawlphetha hmuh thatloh avanga buai chang tawk thin te tan thu lawmawm tak a nih thu leh, tunlai khawvelah lungalhthei leh tuialhthei atanga kawlphetha siamchhuah kalsan telh telh a nizung, luiluang chakna (renewable sources of energy) hmanga kawl-phetha siamchhuah uar deuh deuh a pawimawh zia a sawi bawk.

NHM Mission Director Dr. Eric Zomawia pawhin he hunah hian damdawi In leh Sub-Centre te hi tichangtlung a, inenkawlna tha zawk mipui pe tur chuan khawl hrang hrang a thuam a tul thin thu leh, chung chuan kawlphetha an mamawh reng avangin Energy for Health Initiative chu Mizoram mamawh tak a nih thu a sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man