MLA inthlanpui lo awm tur hlawhtling taka neih a nih theih nan theihtawp chhuah a tul - CEO

Mizoram Chief Electoral Officer (CEO) Madhup Vyas IAS chuan kumin MLA inthlanpui lo awm tur chu hlawhtling taka neih a nih theih nan theihtawp chhuah a tul thu a sawi.

Mizoram CEO hian nimin khan Siaha tlawhin Mizoram Assembly inthlanpui neih tur atana inbuatsaihna kalpui dan te a enpui a, Siaha District thuneitute nen DC’s Mini Conference Room-a inkawmna an neih ah CEO chuan kumin-a MLA inthlanpui lo awm tur chu hlawhtling taka neih a nih theih nan theihtawp chhuah a tul thu sawiinn, mawhphurhna nei zawng zawngte chu an mawhphurhna ngai pawimawh theuh turin a chah a. Mipui ten zalen leh ralmuang taka vote an thlak theih nan ruahmanna tha siam a pawimawh takzet tih sawiin, inthlanna tibuai thei thil a chhuah loh nan mahni hna theuh tha taka thawk turin a chah a. Returning Officer leh Assistant Returning Officer-ten an mawhphurhna an hriatchian theih nan ECI inkaihhruaina bu chhiar tam turin a chah nghal bawk.

Chief Electoral Officer chuan Polling Station tinah Assured Minimum Facilities (AMF) - Duty leh vote thlak turte mamawh zualpui Eng chhit, Tui intur, Inthiarna leh ke-a kal thei lo te Wheel-chair a nawrna tur kailawn te ruahman fel vek tur a nih thu sawiin, heng mamawh hrang hrangte a awm ngei em tih enfiah turin Election Official- te a chah a. Inthlanna hlawhtling tak kalpui a nih theih nan thawhhona tha a pawimawh tak zet tih sawiin, Siaha District Election Official-te thawhpuiah sawmin inthlanpui lo awm tura an inbuatsaihna kawngah duhsakna a hlan bawk.

Nimin-a CEO hova inkawmna hun hi Siaha District Bawrhsap Lalhmunsanga Hnamte chuan kaihruaiin Siaha Election Officer Vanlalchhuanliana chuan Siaha District dinhmun, Electoral Roll ennawnna kalpui dan, Polling Station ruahman dan leh inthlanpui kalpuina tur a inpuahchahna tlangpui te chu sawifiahin a lem nen a entir bawk a ni.

Siaha-a District Election Official-te nena inkawmna hun an neih zawh hnuin Mizoram CEO Madhup Vyas chuan EVM dahthatna hmun (Strong Room) leh Counting Hall tura ruahman lawk te chu a hmunah kalin a enfiah a, hei bakah hian Polling Station thenkhatte a hmun ah kalchilh in a endik nghal bawk a ni.