Cheng vbc. 21 senga District Hospital Serchhip sak tur atan Health Minister in lungphum a phum

Cheng Vbc. 21 senga District Hospital Serchhip building thar sakna tur lungphum chu nimin khan Health Minister Dr. R. Lalthangliana chuan a phum a, he Hospital sakna tura sum ruahman ah hian building sakna tur bakah hmanraw pawimawh leina tur engemaw zat ruahman a ni bawk.

Khum 100 awm theihna tur Serchhip District Hospital building thar sakna tur lungphum hi nimin khan Health Minister Dr. R. Lalthangliana chuan Serchhip District Hospital OPD tual-ah phumin hemi puala inkhawm hi Serchhip Kawnpui VC Hall-ah neih zui a ni a, he hunah hian Health Minister chuan Serchhip District-in Hospital building tha tak an nei thei tur chu lawmawm a tih thu sawiin, a sakna tur sum hi Power Grid Corporation of India Limited (PGCIL) in an Corporate Social Responsibility (CSR) Fund atanga an pek dawn thu leh State sawrkar in sum sen belh ngai lova a vai (za-a za)-a an tum tur a nih thu a sawi a. PGCIL ten an CSR Fund diltu thahnem tak leh DPR tha tak tak te an dawn thin laiin, Serchhip District mipuite duhsak taka Hospital sakna tur sum an pe chu lawmawm a tih thu a sawi bawk. Health Minister chuan mipui hriselna sawrkarin a ngai pawimawh avangin nasa takin tichangtlun tumin tanlak a nih thu a sawi a, Mizoram chhung hmun hrang hrangah hmasawnna ruhrel din belh tam tak a awm a, chung zingah chuan Siaha, Lawngtlai leh Champhai District Hospital building thar hawn a nih tawh thu te, Mamit Hospital building sak mek zawh mai hmabak te, Champhai leh ZMC-a Critical Care Block sak tura bultan te leh JICA nena tangkawpin Cancer Super Speciality Hospital sak tan thuai tura ruahmanna siam a nih thu te Minister chuan a sawi a ni.

Health Minister Dr. R.Lalthangliana chuan Mizoram Sawrkarin kum 5 chhungin hriatlawk loh harsatna tam tak a hmachhawn thu pawh sawiin, COVID hripui do nan budget a telh lawk miah loh Mizoram sawrkar sum cheng vbc. 2000 vel hman a nih bakah Vawk pul hri avang te; ramri buai avanga inkahna thleng te, Myanmar, Bangladesh leh Manipur atangin kan unau raltlan sing tel an rawn luh thu te sawiin, heng harsatna tam takin a tlakbuak chung pawh a Mizoram sawrkarin kum 5 chhunga project lian tham engemawzat a la nei thei chu Pathian malsawmna ropui tak a ni, a ti a. Health Department-ah thawktu indaihlohna nasa tak siamthat tuma hmalakna pawh hripui leng vangin a sukuk thu a sawi bawk.

Serchhip District Hospital sakna tur lungphum phumna hun hi Health Department-a Principal Secretary Esther Lal Ruatkimi IRS chuan kaihruaiin inlawmna thu a sawi a, Serchhip District Bawrhsap kalchhuak ta leh tuna Aizawl DC ni mek Nazuk Kumar IAS bakah PGCIL aiawhin Chief Manager AK. Barua te pawhin thu an sawi bawk a ni.

Khum 100 awmna tur Serchhip District Hospital hi Power Grid Corporation of India Ltd. (PGCIL) Corporate Social Responsibility (CSR) atanga sum hmuh cheng vbc. 21 hmanga sak a ni dawn a, sum hmuh atanga Rs. 18,47,37,080/- chu Hospital building sakna atana hman tur niin Rs. 2,52,61,557/- chu Hospital bungrua leina tur a ni thung a. Hospital sakna tur hian May 27, 2023 khan PGCIL leh Mizoram sawrkar chuan Memorandum of Agreement ziakin thla 36 (May 31, 2025 thleng) chhunga zawhfel tura ruahman a ni a, amaherawh chu a hmun thu chungchang tihfel thuai a nih theih tak loh avangin hei hi pawhsei ngai tura ngaih a ni.

Kumin April 3 khan e-Tender tih-chhuah niin chhangtu mi 5 atangin Zamzo Engineering Construction & Consultancy, Aizawl chu a sak hna thawk tur hian thlan an ni tawh a. Tunah hian a building hlui chu thiat turin sawrkar-ah thlen mek niin hei hi tihfel thuai beisei niin building hlui hi thiah fel a nih hnuah a sak dan tur chu ruahman tur a ni ang.