MISTIC Governing Body thutkhawm CM hovin nei

Mizoram Science, Technology & Innovation Council (MISTIC) Governing Body chu nimin khan Chief Minister Zoramthanga hovin CM Conference Hall-ah an thukhawm.

He thutkhawm ah hian Principal Scientific Officer Samuel Lalmal-sawma chuan MISTIC hnathawh hrang hrang, Research & Development lama an hnathawh mek te, Capacity Building lama an hmalakna te, Innovation leh Technology Deployment lama an hnathawhte bakah Science chawilarna lama an thiltihte leh COVID-19 hripui len laia mipuite mamawh hmalakna an kalpui dan report a pe a, chumi hnuah an kal zel dan tur hmachhawp leh MISTIC thuam chak zelna tur thil hrang hrang te an rel zui a ni.

MISTIC hian Mizoram mipui mamawh tur Science leh Technology hmang zirchian ngai leh hnathawh ngai hmalakna tam tak a kalpui a, Kuva tihrona te, Solar Cold Storage te, Hydroponic Fodder cultivation (Tuia ranchaw chinna) te, Disinfectant- Hypochlorite, Chi (salt) atanga siamna te, Mushroom chinna leh a chi siamna te, Apple (low chilling variety) chin te, Local Aromatic plant chin punna te, Digital Planetarium leh Science Centre thar sak te, Colour Web Offset Press te leh hmalakna dang tam tak an kalpui a. Intellectual Property Right hnuaiah Patent 2, Trademark 16, Copyright 8 leh Geographical Indication 5 te tun thlengin an tihfel sak tawh bawk.