LAD Directorate Building thar Minister in a hawng

Cheng nuai 600 senga sak Local Administration Department (LAD) Directorate Building sak thar chu nimin khan LAD Minister K. Lalrinliana chuan a hawng.

Mizoram New Capital Complex (MINECO)-a LAD Directorate building thar hawnna hunah hian LAD Minister chuan Office building thar chuan ram leh mipui rawngbawl sak kawngah tih takzetna, Pathian hre reng chunga thawk tura inpekna thar siam se a duh thu a sawi a. Directorate Building kiang mai ah hian DLAO Aizawl Office pawh SASCI sum hmanga sak a nih theih nana hmalak a nih thu leh Directorate Conference Hall changtlung tak Vertical Extension hmanga siam tura ruahmanna neih a nih thu a sawi a. LAD hnuaia thawktute'n indaihlohna leh duhkhawp hmanraw neih lohte chhuanlam atana siam lova theihtawp chhuaha mawhphurhnate an hlen thin chu ropui a tih thu a sawi bawk.

LAD Directorate Building thar hi December ni 15, 2019 atanga sak niin July 2023-ah luahluh a ni a. Zothan Consultancy Services, Luangmual, Aizawl te'n a sak hna thawkin a dung ft. 83.10 leh a vang ft. 46 niin Zopa chhiara chhawng 5 a ni a. Building thar hawnna hun hi Teresy Vanlalhruaii, Secretary LAD chuan a kaihruai a ni.