Entlang-a hmalakna tur enfiah

Sawrkar laipui ruahman anga Nagar Van Yojana hnuaia Serchhip Entlang hmun-a ramngaw siamna kawnga hmalak dan tur chu nimin khan Thenzawl DFO hovin Serchhip Sub-Hqrs. YMA hruaitute chuan a hmunah an enho.
Thenzawl DFO Lalbiakchama Chawngthu chuan Nagar Van Yojana hi tunhnaiah EF&CC changtu Minister TJ. Lalnuntluanga chuan Mizoram-ah a lo hawng tawh tih sawiin, he hmalakna hi khawpui-a cheng ten boruak tha leh thianghlim an hmuh theihna tura ramngaw siamna atan te, heng ramngaw hi mipui ten chawlh hahdamna hmun atana an hman theihna tura hmalakna leh kawng hrang hranga hman tangkai theihna tura ruahman a nih thu a sawi a. India rampum-a khawpui thlanchhuah 200-ah kalpui tura tih niin Municipal china kalpui tura tih chu he hmalakna kalpui a nih lai hian Mizoram-ah Aizawl-ah chiah Municipal hi kalpui a nih avangin EF&CC Minister TJ. Lalnuntluanga chuan sawrkar laipui-ah thlenin District tina kalpui tura an rawn phalsak thu a sawi a ni.

Thenzawl DFO chuan he hmalakna atan hian Entlang-a Community Forest chu thlan a nih thu leh Hectare 10-50 a zau mamawh a nih angin Social Forestry hi Hectare 50-a zau anga chhut niin hemi atan hian Hectare khat zelah cheng nuai 4 zel ruahman a nih thu a sawi a. Tunah hian 1st Instalment cheng nuai 132 sanction ni tawhin hemi hmang hian a hungna siam bakah Tui leh lei hum-halhna kawngah te, a pawnna kawng siam leh a chhunga thing phun belh a tulna kawngah te hmalak a ni dawn tih a sawi a. A tira ruahmanna an siam atangin hmalak ngei ngeina tur an thlan hmasak dawn thu leh he sum hi 2022-2023 Financial Year a mi a nih avangin 2nd Instalment hi an hmu leh dawn em tih an hriat loh thu a sawi a ni.

Nimin-a helai hmun enfiahna ah hian Trekking Path, Viewing Tower, Cross over Bridge, Interpretation Centre leh thil dangte siam dan turte enfiah niin heng te hi ramngaw tichhe lova siam a ni dawn a ni.