Chief Minister in khawtlang mamawh enpui

Chief Minister Zoramthanga chuan nimin zing khan Aizawl Laipuitlang leh Ramhlun Veng te tlawhin khawtlang hruaituten an Veng mamawh hmasawnna tur sawrkara an dil hmunhma te a en.

Chief Minister hian Laipuitlang Local Council-in Recreation Centre (Mini Sports Complex) sak an dilna hmunhma chu enin Ramhlun Venglai khawtlangin Ramhlun Venglai Hall sakna atan an dil hmunhmate a en leh a. Hemi hnu hian Ramhlun North khawtlang hruaituten Taitea Step an tih mai lirthei kal theiha siam an dil hmunhma en lehin Ramhlun Vengthar Primary School hmunhma, building lian zawk saa khawtlang mamawh hmunhma hrang hrang dah belh theih tura siamthat an dil hmun a en leh bawk a ni. Chief Minister hian Ramhlun North thlanmual hlui kaltlanga Local Council Road leh Sihpui Road inkar kawng laih an dilna hmun leh Vengchhung hmun awl, vantlang hmun pawimawh atana din an rawtna hmun leh Vengthar H/S panna kawng te a en bawk.