Chief Minister in damlo anmahni pantute hmangaihna nena enkawl turin Nurse te a chah

Chief Minister Zoramthanga chuan Nurse te chu damlo anmahni pantute hmangaihna nena enkawl zel tur leh tha taka dawngsawng thin turin a chah.

Ni 2 chhung awh tur Trained Nurses' Association of India (TNAI), Mizoram State Branch General Conference vawi 19-na nimin a Synod Conference Centre, Aizawl-a neih a hmanpuina ah Chief Minister Zoramthanga chuan Nurse-te hnathawh chu ropui a tih thu leh ram mipuite hriselna kawnga tha thawhtu tangkai leh pawimawh tak an nih thu a sawi a. Nitin-a an hnathawhna leh eizawnna piah lam thil dangah Nurse hmingtha leh chhuanawm tak tak an awm thin chu ropui a tih thu sawiin, Nurse-te chu an eizawnna leh hnathawh a nih mai bakah mihring puite rawngbawlna a ni tih hriaa, damlo anmahni pantute hmangaihna nena enkawl zel tur leh tha taka dawngsawng thin turin a chah a. Mizoram in tunhnaia harsatna hrang hrang a tawhte tarlangin, harsatna tawhte chu tanlakna petu ni zel se a duh thu sawiin, kalkhawmte chu harsatna an tawhte hneh thei tura theihtawp chhuah turin a fuih a. Sawrkar in Health Care System tih changtlun kawnga hma a lak dante tarlangin, Nursing Directorate siam thar a ni chu a lawmpui thu a sawi a. TNAI Mizoram State Branch-te an kalzelna turah duhsakna a hlan bawk.

'The Future of Nursing: Leading Change, Advancing Health and Transforming Care' tih thupui hmanga TNAI, Mizoram State Branch General Conference-ah hian TNAI Hqrs. New Delhi-a Secretary General Evelyn P. Kannan chuan Mizoram Nurse-te zingah thawhhona tha tak a awm chu fakawm a tih thu sawiin, chhawmnung zel turin a chah a. TNAI chu kum 115 a upa, Branch 34, member 5,00,000 leh Zirlai member 2,31,303 nei mek a nih thu sawiin, an hmalakna a sawifiah bawk.

Nimin-a he hun hmanna ah hian Conference hnuhnung ber kum 2019 hnu lama Florence Nightingale Award dawngtu Nurse 4- Dengthangpuii (L), Health Supervisor (Rtd), Kulikawn, Aizawl (2020); Vanlalthuami, Health Worker, Lunglei Theiriat (2020); Vanlalrovi, Staff Nurse, Thingsulthliah PHC (2021) leh C. Zopari, Ward Superintendent (Rtd), Civil Hospital Aizawl, (2023) te hnenah Chief Minister hian chawimawina thilpek a hlan a ni.

Trained Nurses' Association of India (TNAI) hi kum 1908-ah din niin, Mizoram State Branch hi August 1964-ah din a ni a, September ni 1, 2023 thleng khan Mizoram-ah TNAI Life Member 3750 an awm a, District Branch 7 awm mekin TNAI Mizoram Office dinna tur ram Ainawn Veng-ah TNAI Hqrs. chuan a lei sak bawk a ni.