Zirtirtu pek belh phuta kawngzawh tumin GHSS Serchhip-a zirlaite an pungkhawm

Govt. Higher Secondary School Serchhip-a Zirlaite chu Zirtirtu pekbelh phuta kawngzawh tumin nimin khan an School tual-ah an pungkhawm a, Serchhip-a MNF Block hruaitute nen an inkawm hnuah sawrkar hmalakna ngaihchan leh rih nise an ti.
Tarlan tawh angin Govt. Higher Secondary School Serchhip-a Zirtirtu thenkhat chu thlaktu awm lova sawn an nih avangin he School-a zirlai naupangte hi lungawi lovin nimin khan kawngzawh tumin an School tual-ah an pungkhawm a, zirlaite hian Zirtirtu an mamawhna thuziak hrang hrang kengchhuakin aiawh tur dahlova Zirtirtu sawnchhuah an duh loh thu te leh Sawrkar chu a din zirna In te ngaihsak tura an duh thu tarlanna thuziak te an keng a ni.


Hetianga zirlai te an punkhawm lai hian Serchhip East Block MNF hruaitute chuan he School hi MNF Adviser J. Malsawmzuala Vanchhawng hova tlawhin zirlaite hi an kawm a, an School-a Zirtirtu indaihlohna chungchangah sawrkar in hma a lak mek thu leh a nghetha thawktu dah a harsa a nih pawhin SEDP Teacher dah tura ruahman a nih thu te hrilhin, zirlaite chu kawngzawh an tum chu thulh turin an ngen a. Zirlaite pawh hian sawrkar hmalakna ngaichanga kawngzawh an tum chu thulh rih remti in, an thilphut te a hlawhtlin hma loh chuan School kai chunga zirna kalpui rih loh nise an ti a, Vawiin lamah sawrkar hmalakna a lawmawm lam an hmu lo a nih chuan naktuk ah kawngzawh hi an tum nia thudawn a ni bawk.

GHSS Serchhip-a zirlaite chuan norms angin History-a Zirtirtu pahnih (2) awm thin chu kum 2018-ah pakhat zawk Superannuation Pension-a a chhuah hnuin tun thlengin a aiawh tur dah a la nih loh thu an sawi a. Mizo Subject-ah Arts tan pahnih leh Science Stream-ah pakhat neih thin a nih laiin pakhat chu kum 2019-ah Govt. Central HSS Aizawl-ah sawnin tun thlengin a aiawh tur dah ala ni lo niin an sawi a. Physics Zirtirtu norms anga pahnih awm thin chu kum 2021 kumtir ah pakhat sawnin a aiawh tur dah a nih loh thu leh Chemistry-ah norms anga zirtirtu pahnih awm thin chu tunhnaiah pakhat zawk sawn leh a nih thu te an sawi a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar