August thla chhungin Mit na hri kai 2,059 awmin Serchhip District-ah mi 143 hmuh an ni bawk
National Programme for Control of Blindness & Visual Impairment (NPCBVI)-a State Programme Officer Dr. Biaksiami hnen atanga thudawn danin July thla a Mizoram thenawm State a he Mit natna hri 'Eye Flu' ti a an sawi bawk hi a len laiin Mizoram-ah chuan kai an awm thu hriat a ni lova. August chawlhkar hmasa berah khan he Mit natna hri kai an awm thu an dawng a, chawlhkar hnihna atangin he hri kai hi an pung ta hluai niin a sawi. Damdawi In-a inentir mi za zela 20 atanga 30 chu Mit na an ni a, Conjunctivitis natna kai an nih leh nih loh inentir niin tam takin an kai tih hmuhchhuah a ni ta a ni. Conjunctivitis hri kai hi Aizawl District-ah an tam ber a, mi 1,574 in an kai tih hmuhchhuah a ni a. Serchhip District-ah he Mit natna hri kai hi mi 143 hmuhchhuah an ni bawk a. District zawng zawngah pawh he Mit na hri hi a darh tawh ni a hriat a ni.
NPCBVI thuneitute chuan Mit na reng reng chu Doctor rawn turin thurawn an pe a, hemi avang hian damdawi In pan an pun phah ni a an hriat thu an sawi a. Conjunctivitis hri kai zingah harsatna lian tham nei an awm loh thu an sawi rualin NPCBVI hotute chuan, mipuiin he natna chungchang an hriat theihna atan leh a darh zel tur venna atan theihtawp an chhuah zel thu an sawi a ni.
Health Department chuan Mit tih thianghlim nan leh Mit natna leng tur ven nan Mit thlawr hma leh Mit ek inchar a awmin tui chhuanso lum pip pep in hruk tur a nih thu te, Mitthlawr hmain kut silfai thin tur a nih thu te, Rawmawl thianghlim, Tissue, Towel fai chauhin Mittui hruk tur a nih thu te, Pawn chhuahna ah tarmit dum bun thin tur a nih thu leh Kut silfai that tur a nih thu te an sawi a. Antibiotics damdawi thenkhat Moxifloxacin leh Tobramycin te hman kher a ngai lo tih pawh sawiin, Mit nuai loh tur a nih thu te, Lukham leh Towel te chhungte nen inhmantawm loh tur a nih thu leh Mit Doctor emaw, Medical Officer hnenah inentir vat tur a nih thu te an tarlang bawk.
Comments
Post a Comment