Anemia Screening Camp nei

Rampum-a chawtha ei a pawimawh zia inzir-tirna hun, Poshan Maah hman mek pualin nimin khan Serchhip-a Eklavya Model Residential School (EMRS)-ah Anemia Screening Camp leh Health and Physical Fitness pawimawh zia inzirtirna neih a ni.
Women & Child Development Department a DPO Office, CDPO Serchhip leh AYUSH Department te tangtlang in he hun an buatsaih ah hian hun hmasa lamah C. Zonuntluangi, P&SM Instructor AYUSH chuan taksa hriselna leh enkawl that a pawimawhzia te, taksa sawizawi mihringin kan mamawhna te sawiin, mahni awm hmuna taksa kan lo insawizawi dan turte a zirtir a ni.

Hemi hnu hian EMRS-a zirlaite tan thisen tlakchham chungchang inzirtirna neih leh niin Dr. Lalhruaikima, MO (RBSK) chuan thu sawiin, thisen tlakchhamna lo awm theih chhan leh chumi in taksa hriselna a nghawng a neih theih dan te a sawifiah a. Hemi hnu hian zirlai naupang, a bikin tleirawl hmeichhia kum 14 leh 18 inkarte mi 98 te hriselna enfiah sakin thisen tlakchham avanga harsatna an neih leh neih loh te enfiah zui a ni.