Ni 10 chhungin chhungkaw 165 In thiat turin ti

National Highway-54 laihzauh hna thawh mekah Serchhip District-a zangnadawmna la tawh zinga mahni In la thiat lo chhungkaw 165 te chu an In la thiah loh te enfiah a nih hnuah ni 10 chhunga an In thiat tura hriattir an ni.

Kumin July 28-a Serchhip District Addl. DC in thuchhuah siama a lo tarlan tawh angin, National Highway-54 zauhna atana ramlak tawhte chu Competent Authority for Land Acquisition (CALA) in an In te thiat tura a tih anga an thiah leh thiah loh enfiah hna chu tun thla ni 2 atang khan thawh tan a ni a. Ni thum chhung enfiah hun tur ruahman ni mah se enfiah tur a tam avangin ni 4 chhungin khaw hrang hrangte hi enfiah a nih hnuah niminpaih khan enfiah hna hi zawhfel a ni a, Serchhip District chhung khaw hrang hranga mi 165 te chu an In te enfiah a nih atanga ni 10 chhunga lo in thiat fel tura tih an ni a. Nimin khan he hmalakna hi Serchhip District Bawrhsap hova thlirho niin thuneitute chuan ni 10 hnuah heng In te hi thiah a nih leh nih loh enfiah leh a la ni dawn tih an sawi a ni.

NH. 54 laihzauhna tura ram lak tura zangnadawmna pek tawh, mahni In leh thiat lo tun tuma enfiah te hi Serchhip-ah chhungkaw pakhat awmin, Keitum Package-2 ah chhungkaw 27, Keitum Package-3 ah chhungkaw 2, Bungtlang-ah chhungkaw 33, Chhiahtlang-ah chhungkaw 30, Chhiahtlang by-pass a chhungkaw 5, Chhingchhip-ah chhungkaw 59, Baktawng-ah chhungkaw 4 leh Khumtung-ah chhungkaw 4 te an ni a, Khumtung khua hi an khaw chhung tam zawk hi Aizawl District lam chan ah a awm thung a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar