Serchhip-ah nitin khawsakna leh eizawnna kawnga nizung chakna hman tangkai theih dan tur zirho

SELCO Foundation leh Northeast Initiative Development Agency (NEIDA) tangkawp buatsaihin nimin khan Serchhip-ah nitin khawsakna leh eizawnna kawnga nizung chakna hman tangkai theih dan tur kawng hrang hrang zirhona neih a ni.
Serchhip Kawnpui VC Hall-a 'Awareness Meet about Decentralised Renewable Energy (DRE) driven solution' hi Mizoram hmun kilkhawr ber thlenga kan nitin khawsakna a lo awlsam zawk nan leh kawlphetha thianghlim, daihrei, leilung mil leh mitin ban phak tangkai taka kan hman theihna tura intawhkhawmna niin he hun hi SELCO Foundation-a Manager (Operation) Lalrinfela chuan a kaihhruai a. NEIDA-a Programme Officer James Lalthansanga chuan he huna tel te inkawmna thu sawiin, NEIDA chuan kawng hrang hranga hma an lak thin thu leh kan nitin khawsakna leh ei leh bar zawnna kawngah khawl thil kan hmang tam tial tialin heng te hi kawlphetha hmang a nih avangin sum kan hmang hnem hle tih a sawi a. Hei vang hian heng kan hnathawhna hrang hrangah hian nizung chakna (Solar Energy) kan hman theih nan hetiang inzirtirna hi buatsaih anih thu leh Serchhip District-a eizawnna kawng hrang hranga thawktu ten an hman tangkai ngei a beisei thu a sawi bawk.


He hunah hian SELCO Foundation atangin State Lead Tluanga Colney chuan an Foundation hmalakna te tarlangin, Renewable Energy hman tangkaina lam tihlar an tumna kawngah Nizung chakna hman tangkai chu an hmalakna ber a nih thu leh tunah hian Mizoram-a PHC leh Sub-Centre 40-ah CSR atangin Solar Light dah an tum thu a sawi a, Serchhip District-ah pawh pali (4) dah tum a nih thu leh sawrkar nen inremna ziah theih a nih chuan PHC leh Sub-Centre zawng zawngah dah an tum thu a sawi bawk a. SELCO Foundation chu khawl semtu leh petu an ni lo tih sawiin, zirchianna te an neih hnuah subsidy te an pek thin thu a sawi a. Tunah hian District 11 zinga pali ah hma an lak thu leh Serchhip an thlan chhan chu Mizoram pum tana entawntlak ni thei tura an beisei vang a nih thu a sawi bawk.

Nimin-a he hun hmanna ah hian Serchhip District chhunga Block leh khaw hrang hrang atangin FPO, SHG/JLG leh Entrepreneurs thahnem tak telin R. Vanlalauvi Research Coordinator SELCO Foundation chuan SELCO nihphung bakah kawlphetha hman tangkaina Agriculture (loneih), Livestock (ranvulh) leh Micro Enterprises (mimal sumdawnna/eizawnna) a SELCO Foundation hmalakna leh theihna hrang hrang te inhrilhfiah a ni a, kawlkhawm te atangin zawhna leh chhanna hun hman a ni bawk.

Comments

Popular News (Last 30 Days)

LPG man bithliah thar