Ruihhlo Do thupui hmangin TT-a inelna buatsaih a ni

Serchhip District Sports Committee leh Serchhip District Table Tennis Association tangkawp buatsaih ‘Ruihhlo Do’ tih thupui hmanga ‘Serchhip District Table Tennis Championship’ buatsaih chu nimin khan khelh tan niin Vawiin hian zawhfel tum a ni.

District Table Tennis Hall, New Serchhip-a he Tournament hi Serchhip District Sports Committee Sr. Vice President K. Tlangthanmawia chuan nimin khan hawngin India Independence Day den-chhena hetiang Tournament buatsaih a ni chu lawmawm a tih thu leh Sports Association thenkhat te pawhin hetiang bawk hian inelna an buatsaih mek thu a sawi a. District Table Tennis Association ten naupang te inchherna tura hma an la thin chu a lawmawm hle tih sawiin, hei vang hian National Level-ah pawh hmabak eng tak kan nei chho mek nia a hriat thu a sawi a, tunhnaiah pawh Serchhip hming an ti mawi thin hle tih sawiin, District Level a intihsiakna chu duhtawk mai lova State Level atanga International Level thlenga tel thei tura an theihtawp chhuah turin a chah bawk a ni.

Nimin-a he Tournament hawnna hun hi Serchhip District Table Tennis Association-a Secretary Laltlankima chuan kaihruaiin report hrang hrang ngaihthlak a ni a, he Tournament hi nimin chawhma lam atang khan khelh tan niin naupang (Cadet) atanga kum 35 chunglam thleng inelna buatsaih niin Category 10-ah inelna neih a ni a, Tennis Player 87 telin an zinga mi 6 te chu Serchhip khawpui pawnlam atanga rawn tel an ni a. Vawiin hian Final khela zawhfel tum a ni.