Ramchhung hmundangte rualin Serchhip-ah Independence Day 2023 hman a ni

India ramin zalenna a hmuhna ni champha, Independence Day 2023 chu nimin khan ramchhung hmundang te rualin Serchhip-ah pawh hman a ni a, School Education Minister Lalchhandama Ralte chuan India Hnam puanzar pawtparhin Parade Contingent te Chibai buk a chhenglet a, mipuite hnenah thuchah a sawi bawk.

Serchhip Sports Complex-a India Independence Day 2023 lawmna ah hian Education Minister chuan Serchhip District mipuite Independence Day chibai bukin minute 18 chhung thuchah a sawi a. Ram hruaitu hmasa te, ram leh hnam hmangaiha huaisen taka mahni inphata ram zalenna sualtute hre reng tur leh mahni a ro in rel sawrkar kan neih theihna tura theihtawp chhuah a, hmathlir thui tak nei chunga ram zalenna sual chhuaktute hnenah zahna leh chawimawina hlan turin a sawm bawk a ni.

Kum kalta chhunga sawrkar hmalakna hrang hrangte Minister chuan tarlangin, Mizoram Sawkar Flagship Programme SEDP hmanga sawrkar hnathawh langsar zual thenkhat te tarlangin, PWD Serchhip Division in inkalpawhna kawngpui engemawzat an chei that thu te, AH&Vety Department kaltlanga SEDP Pilot Project leh Family Oriented SEDP hmanga tanpuina an pekchhuah te, Commerce & Industries hnuaia Trade hrang hrang thlangtuten Family Oriented SEDP hmanga tanpuina an dawn tawh thu te a tarlang a ni.

School Education Minister Lalchhandama Ralte chuan a Department chan School Ecducation Department hnuaia hmalakna te tarlangin, kum 2023-2024 Academic Session atan naupang 4998 te hnenah zirlaibu a thlawna sem a nh thu leh Primary School naupang 1997 leh Middle School naupang 1703 te hnenah a thlawna Uniform semchhuah a nih thu a sawi a; Midday Meal pawh naupang 6733 te tan buatsaih mek a ni tih sawiin, Govt. Middle School leh Govt. Primary School te tan Choka bungrua sem mek a nih thu te a sawi bawk.

Heng bakah hian Chhingchhip-ah Elementary zirlai hmeichhe naupang te tan Netaji Chandra Bose Avasiya Vidyalaya Hostel siam a nih thu leh Thenzawl-ah Secondary hmeichhe naupang tan Hostel hawn thar a ni tih Minister chuan sawiin, Baktawng Govt. P/S leh Khawbel Govt. P/S thawmthat a ni a, Kanghmun South Secondary School leh Khawbel Secondary School ah te Teachers quarters sak hna thawh mek a ni tih a sawi bawk.

Zirlai naupang rualbanloten tha taka School an kal theih nan sawrkar hmalak dan Education Minister chuan sawiin, naupang 20 hnenah Escort Allowance pein naupang 25 hnenah Transport Allowance pek an ni tih a sawi a, Braille Stationery Material pawh naupang 3 pek an nih thu leh Hmeichhe naupang 94 hnenah Stipend for Girls pek a ni a, an mamawh ang zelin Wheelchair, Tarmit, Bengdar leh a dangte pek thin an nih thu a sawi bawk.

Kuthnathawktute tana sawrkar hmalakna te pawh Minister chuan tarlangin, leilet nei chhung-kaw 55 tan Lane Levelling Unit 109 pekchhuah an nih thu a sawi a, ran chaw siamna Composite Feed Mill, Hriak sawrna Mini Oil Expeller Unit leh Kurtai siamna khawl bun fel a nih tawh thu te, thlai chin tur engemawzat semchhuah a nih thu te a sawi a. Vaimim thar kawngah tan lain Serchhip District chhung khaw hrang hranga Vaimim 3167 MT thar chhuah a ni tih a sawi a; Zikhlum chin kawngah nasa taka hmalain kum 2022-23 chhung khan quintal 10,000 tharchuah niin cheng vbc. 1.2 man zet a nih thu a sawi bawk.

District Industries Centre, Serchhip hnuaiah Industrial Registration nei Unit 186 an awm thu pawh sawiin, PMEGP Loan diltu mi 13 hnenah cheng nuai 154.78 pek an nih thu leh PMFME Scheme Unit 3 hnenah Loan pek an ni tih a sawi a. Department dang hmalakna te pawh a tarlang bawk a ni.