KMMTTP-a ram neitu ten Pisa kai tur la dan tum

Kaladan Multi Modal Transit Transport Project (KMMTTP)-in a tihchhiat ram neitu intelkhawm ten kar kalta Thawhlehni atanga Dy. Conservator of Forest, Chhimtuipui Wildlife Division Office-a thawktute Pisa kai tur an dan chu Vawiin lam pawh hian dan chhunzawm zel an la tum.

Lawngtlai District Land Owners Association President T.Zatlunga chuan KMMTTP kawngpui Kilometres 88 a thui ah State Sawrkar Environment, Forest & Climate Change Department chuan KM 80 vel chu an ram angin an chhal tih sawiin, hei hi a diklo tih Guwahati High Court pawhin a tihchian tawh thu leh ACB lam pawn an lo chhuichian tawh thu a sawi a, ram neitu dik tak mi 138 te ram, Mizoram Sawrkar hnuaia Forest Department-in a chuhpui tlat chu hriatthiam theih a nilo tih a sawi a. Ministry of Road Transport and Highway-ah Forest Department hian an ram anga an lo hauh ngawt a diklo tih High Court a tihchian tawh chu, hauh lui zel lovin thil awmdan chiang taka hrilhin Clearance a pek thuai chu an phut tlat tih a sawi a ni.

Ram neitu intelkhawmte hian Lawngtlai District chhimlam leh khawtlang lamten inkalpawh nan ber an hman KMMTTP kawngpui pawh company ten an enkawl an remti lova, leivung tla-in kawng a hnawh pawh thenfai hleih theih lohin a awm a. Ramneitute chuan Sawrkar atangin innghah ngamna thu lawmawm engmah an la dawnglo tih sawiin, tunkar ah pawh hian Mizoram Sawrkar hnuaia Dy. Conservator of Forest, Chhimtuipui Wildlife Division Office, Lawngtlai-a thawktute Pisa kai tur chu dan zui zel an la tum thu an sawi a ni.