Union Minister in Bio Safety Level-II Lab. leh Mushroom Spawn (Seed) Production Unit a hawng

Mizoram-a rawn zin mek Union Minister of State for Agriculture & Farmers' Welfare Shobha Karandlaje-i chuan nimin khan College of Veterinary Sciences & Animal Husbandry, Selesih-ah Bio Safety Level-II Laboratory (BSL-II) leh Mushroom Spawn (Seed) Production Unit a hawng.

Bio Safety Level-II Laboratory (BSL-II) leh Mushroom Spawn (Seed) Production Unit a hawnna hunah hian Union Minister Shobha Karandlaje-i chuan Prime Minister Narendra Modi a'n loneitute/kuthnathawktute a ngaih pawimawh ber an nih thu sawiin, an hmasawnna tur Scheme tam tak ruahman a nih thu a sawi a. Sawrkar hmalakna avangin khawvelah thlai chi hrang hrang engemawzat leh bawnghnute thawn-chhuak tam ber kan ni tih sawiin, hetih rual hian India ram chhunga chengte ei leh bar hnianghnar taka kan la intodelh thei lo thin chu an vei em em tih a sawi a. Mizoram chu mihring cheng an tlem avangin ei leh bara intodelh tura tan lak a harsat loh a rin thu leh abik takin sawrkarin kuthnathawktute tana ruahmanna hrang hrang a siamte ngaihven turin a chah a, sawrkarin an tana ruahmanna leh hamthatna chi hrang hrang a siam te chu ngaihven a chhawr tangkai tura a chah bakah Kuthnathawktute hrilhfiah leh zirtirna kawngah tan lak a ngai hle tih a sawi bawk.

Union Minister chuan Zirlaite chu an zirlaiah taima taka thawk tura chahin, an thiamna zirchhuahte chuan kuthnathawktute hnen a thlen loh a, kuthnathawktuten hmasawnna atan an hman loh chuan awmzia a awm dawn lo tih a sawi bawk a ni.

Mizoram sawrkar-a Agriculture Minister C. Lalrinsanga pawhin Central Agriculture University, Imphal hnuaiah Mizoram-ah Horticulture College, Thenzawl leh College of Veterinary Sciences & Animal Husbandry, Selesih te din a nih thu leh kawng hrang hranga Mizoram in hma a sawnpui thu a sawi a. Mizorama loneitute/kuthnathawktute tharchhuah a lo pun zel theihna tura hmalakna chi hrang hrangte a tarlang bawk.

Bio Safety Level-II Laboratory (BSL-II) hi College of Veterinary Sciences & Animal Husbandry, Selesih-a awm tur niin Mushroom Spawn (Seed) Production Unit hi KVK (Krishi vigyan Kendra), Aizawl-ah dah a ni thung a. Union Minister of State hian College of Veterinary Sciences & Animal Husbandry-a KVK ten Exhibition an buatsaih a en bakah PM Kishan Scheme hnuaia kuthnathawktute nen an inkawm a, loneitute harsatna tawh chi hrang hrangte a ngaihthlak sak a, a tul anga hmalak a nih tur thu in a chhang a ni. Union MoS hian Mizorama loneitute tan hmunhma zau tak neih a har avangin thlai leh theirah an chin bakah ran vulh tel thin ni se awmzia a neih a beisei thu a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar