Union Minister hnenah thlen

Mizoram sawrkar-a Environment, Forest & Climate Change changtu Minister TJ. Lalnuntluanga chuan nimin khan Union Minister of Environment, Forest & Climate Change Bhupender Yadav chu a Office-ah hmuin Mizoram mamawh hrang hrang a sawipui.

Minister TJ. Lalnuntluanga hian Union Minister hnenah hian Forest Department hnuaia Fund pending hrang hrang; Wildlife Protection Squad hlawh, CSS-Integrated Development of Wildlife Habitat (IDWH) hnuaia thawktute hlawh bakah department kaltlanga hmasawnna ruhrel thawh hrang hrang, Project Tiger hnuaia Fund pek tawh loh chungchang leh Champhai Tlangsam-a Satellite Wildlife Rescue Centre dinna tur approval awm vek tawh, Fund la sanction lohte sanction thuai a nih theih nana hmalakpui turte in a ngen a. Forest Department-in hmasawnna an neih theihna tur kawng awm thei hrang hrangte pawh a sawipui bawk.

Heng thil thlen hrang hrangah hian Union Minister chuan hmalak nghal a nih tur thu a lo hrilhin Wildlife Sanctuary leh National Park pahnih, Murlen National Park leh Phawngpui National Park-a thawktute hlawh nikum atanga tang tawh chu sanction order a siamtir nghal a. Heng National Wildlife Park pahnih chhunga Wildlife habitat siamna tur leh Developmental Eork thawhna tur hrang hrangte pawh sanction tel a ni bawk.

Champhai Tlangsam-a Satellite Wildlife Rescue Centre dinna tur approval awm tawh chu Financial sanction a nih theih nan Technical Committee-in August thla chawlkar hmasa berah an ngaihtuah nghal tur thu pawh sawiin, Forest Department-in Wildlife Crime hrang hrang do nana Wildlife Protection Squad dinna tura proposal a thehluh an pawm nghal thu a lo hrilh bawk a, khawpui hmun hrang hrang 14-a khawpui ngaw humhalhna tur project siam pawh pawm nghal a nih thu a lo hrilh a ni.