Rural Development hnuaiah kum 5 chhung in Scheme pawimawh tak tak kalpui a ni - RD Minister

Rural Development changtu Minister Lalruatkima chuan Rural Development hnuaiah Scheme pawimawh tak tak te kum 5 chhung khan kalpui a ni tih sawiin, MNREGA phei chu India ramah ni 100-ah 100 kalpui thei awmchhun State kan nih thu a sawi.

Rural Department hnuaia Scheme pawimawh tak tak kalpui dan thlirhona leh chak zawk kalpui dan tur sawihonn nimin a Woodland Hill Conference Hall, Zonuam-a neih ah RD Minister Lalruatkima chuan Rural Development Department chu thingtlang mipui te chawikanna atana department pawimawh ber leh thingtlang mite ta deuh bik a ni tih sawiin, Rural Development a thawk te chu Officer lian zawk atanga hna hniam zawk thawktu thlenga hawihawm, dawrnuam leh thingtlang mite tana dawr nuam ni chhunzawm tura a chah bakah BDO te pawh an bialtu MLA te nen inlaichinna tha nei turin a chah a. Rural Development hnuaiah Scheme pawimawh tak tak te kum 5 chhung khan kalpui a ni tih sawiin, MNREGA phei chu India ramah ni 100-ah 100 kalpui thei awmchhun State a nih thu sawiin, “Hei hi hlawhtlinna a nih bakah Hripui a len lai pawha chhuanchham awm lova chhungkaw tam tak kan awm theihphahna a ni a, a lawmawm takzet a ni,” a ti.

RD Minister chuan MzSRLM hnuaiah Self Help Group(SHG) tam tak Mizoram dung leh vang ah an awm tawh thu sawiin, heng SHG te hian kawng hrang hranga hma lain sum an thawkchhuak mek tih a sawi a. PMAY(Grameen) - miharsate Insak tanpuina pawh chak takin kalpui mek a nih thu leh Third party avangin harsatna tenau awm mah se kuminah chuan AWAAS+ pawh an zo hman turah a ngaih thu a sawi a. Amrit Sarovar hnuaiah lui leh tuihna te hmun tam takah khuah niin heng te hi ranvulhna, huan thlai enkawlna bakah ei leh in atan leh thil tangkai danga hman tur a nih thu leh he hmalakna kawngah hian Mizoram chu a thawk tha ber zinga mi a nih thu a sawi a, heng hmalakna te bakah hian SIRD&PR leh SAU hmalakna te a sawilang bawk.

Rural Development a enkawl chhunga Department tihchangtlunna leh mipui tana tangkai bawk si hlawhtlinna an neih chu RD Block 2 - Kawrtethawveng RD Block leh Tlabung RD Block te ni tih Minister chuan sawi bawkin, Department chhung bikah DRDA thiah taka Officer leh Staff 87 hna ngheta dah an nih bakah Project Director, DRDO posts chu MCS Officer JAG post atana rinluh te pawh hlawhtlinna langsar tak a ni tih a sawi a. RD Block kilkhawr zawk leh Aizawl atanga hla deuh zawkah te Panchayati House engemaw zat sak tawh leh sak mek a nih thu te sawiin, hengah te hian mikhual leh Sawrkar hnathawk zin veivak tan thlen theih a nih thu a sawi a. RD Officer te chuan an hlawhtlinna te chu duh tawk lovin thingtlangmite tana hmasawnna lian zawk a awm theihna turin sawihona nei chhunzawm turin a chah bawk a ni.