Tawngtai rualna nei turin ti

Mizoram Presbyterian Church, Synod chuan Manipur tualchhung buaina avanga harsatna tawk te tan tun thla ni 9 (Pathianni) zan inkhawmah Kohhran hrang hrangah tawngtai rual nise an ti a. Manipur-a Meitei leh Tlângmite inkara buaina chhuak chu  pawi a tih thu sawiin, Biak In, Koh-hran Office leh Quarters te leh mimal In thahnem tak hâl a ni te, pawisawi lo nunau nunna laksak bakah râwng taka chêtna te chu an dem takzet tih an thuchhuahah chuan an tarlang a. Manipur-ah remna leh muanna a awm leh theih nana hma la turin Manipur sawrkâr hruaitute leh Central sawrkâr hruaitute an phut tih an sawi bawk.