Serchhip District-ah Anganwadi Centre 160 awmin Nutrition dawnglai 7115 an awm
Nimin khan Serchhip DC Meeting Hall-ah District Bawrhsap Nazuk Kumar IAS hovin District Convergence Meeting leh District Nutritional Committee thutkhawm neih niin he hunah hian Serchhip District chhunga ICDS Project hmalakna hrang hrangte thlirho a nih bakah hmalak zel dan turte sawiho a ni a. He huna tarlan a nih danin Serchhip District chhungah hian Anganwadi Centre 160 awm mekin Anganwadi Centre diltu Serchhip Saron Veng dilna chu thuneitu sang hnenah thlen nise an ti a, Serchhip Field Veng VC leh Kanghmun South VC ten building thar mamawh thu an thlen pawh sawiho a ni bawk. Heng bakah hian District chhunga Anganwadi Centre zinga Nutri Garden la nei lo ten an neih ve theih dan turte sawiho niin Tui Connection la nei lo Anganwadi Centre 50 ten Tui Connection an neih theih dan turte, Toilet hlui tawh lutuk leh hman hleihtheih tawh loh hrang hrang thuamthat dan tur te, LPG Connection la nei ve lo te ngaihtuah sak dan turte pawh sawiho a ni bawk.
Poshan Tracker in report a tarlan danin tun dinhmunah Serchhip District-ah hian Supplementary Nutrition Programme hnuaia Nutrition dawng mek Raipuar 517, Hnute pe lai nu 383, Nausen thla ruk hnuailam 382 leh thla ruk leh kum thum inkar naupang 2643; kum thum atanga kum ruk inkar naupang 3184 an awm mek a. An vaiin Supplementary Nutrition Programme hnuaia Nutrition dawng lai zawng zawng hi 7115 an ni. Kumin June thlaa Poshan Tracker data tarlan dan vekin kum ruk leh a hnuailam Severe Acute Malnutrition (chaw tha mamawh lutuk) tanpuina dawng lai naupang 33 leh Moderate Degree Malnutrition (chaw tha mamawh belh) tanpuina dawng 88 an awm a. Moderate underweight (naupang zang mah mah) naupang 180, Severe Underweight (naupang zang leh lutuk) 25, naupang rit leh lutuk (over weight) 139, Thau uchuak (obese/very fat) 73, thanthu zual/thang thei lo tak (Severely stunted) 227 leh thang tha tawk lo (moderately stunted) 482 an awm mek a ni. Poshan Tracker hi thawktuten nitin-a an dahluh thar (daily update) zel te, thlabia an dah luh thar (monthly update) zel te a awm avangin a danglam ve reng thin a ni.
He thutkhawm kaihruaitu District Bawrhsap Nazuk Kumar IAS chuan ICDS Project hnuaia thawktute chu naupang Severe Acute Malnutrition hnuaia enkawl lai 33 te chu thla thum (3) chhunga Moderate Level a awm chhohtir ngei tum turin a ngen a, chutiang naupang nu leh pa ten an fate eitur tha leh damdawi leina an lo nei zo chiah lo a nih pawhin khawtlang hruaitute, Kohhran leh tlawmngai pawlte pawhin chutiang naupang te chu tanpui an inhuam a rin thu a sawi a, anni hote nena tan lo la thiam turin a chah bawk a ni.
Comments
Post a Comment