Doctor ten lungawi loh lantir titawp lailawk rih
Nimin lama tarlan tawh angin MGDA hian sawrkar laka an thilphut te tih hlawhtlin ngiatin nimin atang khan an hnathawhna hmunah Bagde dum belin lungawi loh hi an lantir a, nimin zing khan MGDA hruaitute hi Deputy Chief Minister Tawnluia leh Health Minister Dr. R. Lalthangliana ten leng-ah sawmin H&FW Board Vice Chairman Dr. ZR. Thiam-sanga bakah Health Department leh Finance-a Principal Secretary bakah DP&AR-a Secretary leh sawrkar hotu pawimawh dangte an tel a, he hunah hian Sawrkar hmalak mekna leh July thla Cabinet Meeting-ah an thilphut te hi ngaihtuah a nih tur thu tarlan a ni.
Hemi hnu nimin chawhnu dar 2:30 khan Chief Minister Zoramthanga chuan MGDA hruaitute hi kawm lehin sawrkar ruahmanna a sawipui a, MHS Restructuring chungchang chu July thla Cabinet Meeting-ah ngaihtuah leh a theih anga tih hlawhtlin ngei a lo tiam bakah nawrh chhunzawm lo turin an lo ngen bawk a ni.
MGDA Executive Committee chuan an thilphut, sawrkar Committee sangin recommendation a lo siam tawhte chu July thla chhung ngeia Cabinet Meeting-a ngaihtuah a theihtawp chhuaha tihhlawhtlin an tum thu Chief Minister leh Deputy Chief Miniter leh Health Minister bakah sawrkar Official ten an sawi vek chu rintlak ah ngaiin ni hnih chhung Badge dum bel an tum leh July 13 atanga Mass Casual Leave lak an tum chu thulh lailawk rih nise an ti a. MGDA member-te chu hruaitute thuchhuak lo ngaichanga zel turin an in chah bawk a ni.
Nimin-a Mizoram Govt. Doctors' Association ten an thilphut tih hlawhtlin ngiata Badge dum an bel hi Serchhip-a Doctor awm te pawhin zawmin an hnathawhna ah Badge dum an bel a ni.
Comments
Post a Comment