Silchar Mizoram House-ah venhimna ti khauh

Silchar-a hmunpui nei Meitei pawl pakhatin Mizoram an vau hnuah Silchar Mizoram House-ah venhimna khauh leh zuala kalpui a ni. Silchar Mizoram House Deputy Resident Commissioner (DRC) S. Kaptluanga chuan Inrinni khan thupek chhuahin Mizoram House chhunga lut turte reng reng chuan duty-te hnenah tunge an ni tih finfiahna chiang tak an entir tur a ni a. Duty Officer leh Assistant Resident Commissioner lungawina tura mahni nihna tihchianna neite chauh Silchar Mizoram House chhungah luh phal a ni ang. Hetianga venhimna khauh zawka kalpui a nih chhan hi June ni 14-a All Assam Manipuri Youth Association (AAMYA)-te’n thuchhuah siam bakah chanchinbu mite kawma Mizoram leh rorellai party MNF an vau vang ni a thudawn a ni.