Central YMA ngenna angin Aizawl-a hnamdang thurualpui-a sumdawnna hmun nia hriat te khar

Aizawl khawpui chhunga Iron Rod, Cement leh Balu dawr siam zingah dan lova Hnamdang mite thurualpuia siam nia hriat dawr te chu Central YMA hruaitute chuan Inrinni khan an dawr-ah theuh kal chilhin khar turin an ngen a, dawr engemaw zat chu khar nghal a ni.

Central YMA hian YMA Kumpuan "Ram leh Hnam Humhalh" kawnga an hmalakna kawng khat atan Mizo hming hawha Hnamdang ten Rod leh Cement dawr an hawn leh Mizo ten Hnamdang thurualpuia hetiang lama sumdawng kalpuite chu hun engemaw chen an zirchian hnuah list an siam chhuak a. Central YMA te hian an list-a awm zawng zawng dawr neitute leh an dawr awmna area Branch YMA hruaitu theuhte chu April ni 10, 2023 khan Central YMA Hall, Tuikhuahtlang-ah kokhawmin ngenna an lo siam tawh a. Hemi ni atanga thla khat (ni 30) chhunga an Hnamdang thurualpuite nen lo in chingfel turin hun an lo pe tawh a. Hetia an huntiam a ral hnu tun thla ni 12 khan dawr awmna area Branch YMA hruaitute inrawnkhawm leh a nih hnuah hnatlang koh hi an rel a. All Mizoram Cement & Iron Rod Dealers Association (AMCIRDA) te zirchianna nena enkawp chungin chung atanga rinhlelh kai dawr 91-te chu Inrinni khan Central YMA in hnatlang kovin, thuang 5-a in sem darhin hmalakna hi kalpui a ni.

Central YMA President R. Lalngheta chuan zawhna chhangin hemi kawnga an hmalakna kal zel dan tur chu Committee in a la rel zel ang tih a sawi a. Thla khat chhunga lo in chingfel tura an ngenna ngaipawimawha an dawr khar tawhte, an Hnamdang kawpte lo ti tawp mi engemaw zatte chungah Central YMA hminga lawmthu sawiin, Mizorama sumdawnna chu a ram leilung fate ngeiin an kalpuia, Hnamdang kuta sumdawnna sum leh pai a luang lut nasa lutuk chu hnam tan a him lova, Mizo mipuite tanrual a tul takzet a ni, a ti. Central YMA President chuan he an hmalakna kawngah hian Mizo mipui zawng zawngte thlawpna leh tawiawmna ngenin, Iron Rod leh Cement hmanga sumdawnna hi Mizote kutah ngei a hlawkna tam ber a luan luh hi an duh thu a sawi a, “Hnamdang dan lova lo sumdawn puite pawh anmahni kut ngeia an sumdawnna a awm theih nan hma kan la zel dâwn a ni,” a ti bawk.