Science Hackathon kharna inkhawm neih a ni

Power Minister R. Lalzirliana chuan, “Khawtlang nun hmasawnna atana pawimawh bulpui chu zirna a ni,” a ti.

Rise and Shine, Samagra Shiksha leh Education Department buatsaih Mizoram pum huap Science Hackathon kharna inkhawm nimin-a ATI Auditorium, Aizawl a neih a hmanpuina ah Power Minister chuan he thu hi sawiin, ram leh hnam hmasawnna turin field hrang hrangah mithiam bik kan neih a ngai a, chutiang mithiam chherchhuak tur chuan Education kan mamawh a ni, a ti a. Mihring nunah zirna hian tawp ni a nei lo tih pawh sawiin, zirna tluang pangngai piah lamah Co-Curricular Activities, heng Hackathon ang chi te a pawimawh a, hlawhtling taka Mizoram chhunga zirlaite tana Science Hackathon buatsaih a ni chu lawmawm a tih thu a sawi bawk. Minister chuan  Mizoram-ah Lo vah leh hal kan la kalpui reng avangin kan ramngaw te a chereu zel tih pawh sawiin, a thlakna tur Lo neih dan tha zawk ngaihtuah a ngai tih a sawi bawk.

Rise and Shine hmalakna Science Hackathon hi zirlai ten lehkhabu atang chauh ni lo, a taka Science thiamna an neih theih nana ruahmanna siam a ni a. Mizoram-ah hian Rise and Shine Programme hi Bhoomi Educational Consultancy ten an duang a ni. Tun tuma Science Hackathon hi Class 6 atanga Class 10 zirlaite tana buatsaih niin Round thum-ah then a ni a, Quiz Round, Live Challenge leh Final Meet up neih a ni a. Zirlai titha zual 10 thlang chhuakin nimin khan ATI Auditorium-ah mipui hmaa project sawifiahna (presentation) hun an hmang a ni. Heng zirlaite atang hian Lira Lalrinsangi, Class 9 Govt. Mizo H/S chu pakhatna niin Rs. 10,000/- a dawng a, Lalrinzuali, Class 8 Govt. Chhinga Veng M/S chu pahnihna niin Rs. 7000/- leh Govt. Mizo H/S-a Class 10 zirlai Lalhmangaihzuala chu pathumna niin Rs. 5000/- an dawng a ni.