RD Deptt. tan IFMIS a tangkai lehzual dawn tih sawi

Rural Development Minister Lalruatkima chuan RD Department chu sum che vel tamna a nih thu sawiin, tihsual palh laka inven leh chak zawka hmalak nan sawrkar in IFMIS a chhawpchhuak chu a tangkai lehzual dawn tih a sawi.

Rural Development Department buatsaih ‘Sensitization Training on Government Accounting and Office Procedure’ nimin-a RD Directorate Conference Hall, Aizawl-a neih khuallian nia a hmanpuina ah RD Minister chuan Office kalphung leh IFMIS (Integrated Financial Management and Information System) chungchang training buatsaih a ni chu lawmawm a tih thu a sawi a. Sawrkar hnathawk hlawh leh bill zawng zawng IFMIS kaltlanga pekchhuah a nih tawh avangin training chu a pawimawh hle tih sawiin, khawvel changkang zelah thiamna pawh a sang chho zel a, Computer hmangin engkim tih a nih tawh avangin thawktute pawh inzir thar a, intahhriam reng a ngai tih a sawi a. Khawvel hmanhmawh tawh takah awlsam zawka hnathawh a nih theih nan thawktute pawh in her rem ve zel a ngai tih sawiin, “A bikin RD Department chu sum che vel a tam hle a, tihsual palh laka inven leh chak zawka hmalak nan sawrkar in IFMIS a chhawpchhuak chu a tangkai lehzual dawn a ni,” a ti a. Office kalhmang leh dan hriatchian loh chuan chetsual palh a awl thu pawh sawiin, training chuan rah tha a chhuah ngei a beisei thu a sawi bawk.

Ni 2 awh tur he training hawnna hunah hian Minister chuan Rural Department Department-a thawkte chu fakin hripui leng karah ramchhunga MGNREGS (ni 100 inhlawhna) titha ber pawl an nih thu te, MIS (Management Information System) felfai tak an enkawl thu leh Project hrang hrang a an hlawhtlinna te chu thawktute thawhrim vang a ni tih a sawi a. Hmalam hunah pawh rahbi thar kai zel thei turin lungrual taka thawk leh tang ho turin a fuih nghal bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man