A thlawna bengdar dawn theih dan tur sawihona nei

Mizoram-a Beng tha lo leh ri hriatna lama harsatna tawk ten a thlawnna Beng dar (hearing aid) an dawn theih nana hmalak dan tur chu nimin khan Governor hovin sawiho a ni.

Governor Dr. Hari Babu Kambhampati chuan Mizoram a Beng tha lo leh ri hriatna lama harsatna tawk ten a thlawnna Beng dar (hearing aid) an dawn theih nan hian Deen Dayal Sravana Foundation (DDSF) te kolutin nimin khan Raj Bhavan ah DDSF hotute leh Health Department bakah Social Welfare & Tribal Affairs Department Official ten Governor kaihhruaiin thawhho dan tur an sawiho a. Governor chuan Deen Dayal Sravana Foundation hmalakna tlangpui sawiin, India hmun tam takah Beng lam harsatna nei te zawnchhuah leh a thlawna Hearing Aid pek kawnga hna ropui tak an thawk mek tih a sawi.

Governor chuan DDSF te chuan a thlawna Bengdar pekchhuah an inhuam tih sawiin, State Health Department leh SW&TA Department ten Beng dar vuah mamawhtu zawnchhuah kawng ah an pui erawh a ngai tih a sawi a. He thawhhona hi harsatna a awm loh chuan a ranglama kalpui nghal theih a nih thu leh a thawhkhatna atan Zirlai LKG atanga College inkar te chu ngaih pawi-mawh a nih thu a sawi bawk.

Mizoram Sawrkar aiawhte chuan Mizo-ram-ah thlawna Bengdar dawng duh leh mamawh tam tak an awm mek tih he hunah hian sawiin, District tinah deuhthawh ah Audiologist leh Audiometric Assistant te an awm a. Screening pawh kalpui thin niin tunah hian mi 100 chuang Hearing Aid mamawh an awm mek tih an sawi a. Tuna an chhinchhiah zat aiin Beng dar mamawh an tam tih sawiin, Screening pawh a hranpaa Camp buatsaihin a neih theih tih an sawi bawk.