Multilevel Car Parking & Multipurpose Hall hawng

Chief Minister Zoramthanga chuan nimin zing khan Multilevel Car Parking & Multipurpose Hall, Govt. Mizo High School, Aizawl chu a hawng a, Transport Department chuan School Education Department hnenah building hi an hlanchhawng nghal a ni.

Multilevel Car Parking & Multipurpose Hall hawnna hunah hian Chief Minister chuan lirthei park na leh Jall tha tak mipui hman tangkai tura hawn a ni chu lawmawm a tih thu sawiin, tunah chuan khawpui tawt tihthawl dan tur kawng hrang hrang dap a ruahman a tul tak thu leh sawrkar pawhin Parking House Scheme a siam thu a sawi a. Ram hmasawnna tur ruahmantu chuan ngaihtuahna fing tak nen hmathlir thui tak a neih a pawimawh zia a chian thu a sawi bawk.

Multilevel Car Parking & Multipurpose Hall hi State sum atanga sak niin Main building-ah cheng nuai 495, Vertical Extention-ah cheng nuai 50, Mass concrete-ah cheng nuai 60.06 leh Monitoring-ah cheng nuai 5 sen niin a vaiin cheng nuai 610.06 sen a ni a. He Hall sak chungchanga mawhphurtu a ruat chu Transport department niin a sak hna hi VINCO Construction in an thawk thung a ni.

He building sakna tur hian Feb. 1, 2021 khan inremna ziakin thla 24 chhungin (Feb.1, 2023 thleng) sak zawh tura ruahman a ni a, rokhawlhna eng engemaw avangin April ni 30, 2023 thleng khan hun pawhsei a ni. He building hi 620 sqm a zau niin chhawng thum a awm a. Basement ah hian Car 15 leh Two Wheeler 30 lengin, Ground Floor-ah Car 18 leh Two Wheeler 21 a leng bawk a, a vaiin Car 36 leh Two wheeler 51 a dah theih a ni. Third Floor hi Multipurpose Hall atana ruahman niin, hetah hian Badminton Court pathum a awm thei bawk a ni.

Comments

Popular News (Last 30 Days)

LPG man bithliah thar