Khawvel hriata Mizote phochhuaktu pawimawh tak chu Mizo hnam leh ram hmangaihna hi a ni - Chief Minister

Chief Minister Zoramthanga chuan Zirlaite chu an zirlai tibuai thei hrang hrang lak atanga fimkhur tura chahin, “Khawvel hriata Mizote phochhuaktu pawimawh tak chu Mizo hnam leh ram hmangaihna (nationalism) hi a ni,” a ti a. Mizoram chu Zofa zawng zawngte ‘Jerusalem’ a nih thu a sawi bawk.

Mizo Zirlai Pawl (MZP)-te buatsaih Mizoram Board of School Education (MBSE)-in High School Leaving Certificate (HSLC) result a tihchhuah a Top 10-a lang Mizo zirlaite chawimawina hun nimin-a Aizawl Vanapa Hall-a neih a hmanpuina ah Chief Minister Zoramthanga chuan HSLC Topper-te chu a lawmpui thu sawiin, tun tuma hlawhtlinna an chan chu duhtawk mai lova, zirna sang zawk an zir hunah theihtawp chhuah zui zel turin a fuih a. Tun tuma chawimawina dawngtute leh zirlai dangte pawhin theihtawp an chhuah chuan Mizoram mai nilo India ram pumah pawh a ber thleng phak an nih theih thu sawiin, eizawnna kawng zawhna ah tuina, thiamna leh theihna a inan vek theihloh thu a sawi a, “Eng kawng pawh zawh ila, mi tangkai ber ni thei tura inzir leh thawhrimna a pawimawh hle a ni,” a ti bawk.

Chief Minister chuan Zirlaite chu an zirlai tibuai thei hrang hrang lak atanga fimkhur tura fuihin, Ruihhlo, zuk leh hmuam leh thlemna hrang hrang do hneh turin Pathian-a innghat tlat turin a chah a. Zirlaite chu vawi khat hlawhchhamna ah beidawng lo tur leh hlawhtlin hma chu bei nawn turin a duh thu a sawi a. Talent an neih ang ang te hmangthiam tura fuihin, harsatna kara hlawhtlinna chang turin zirlaite duhsakna a hlan bawk.

Thangthar zingah hnam rilru pu an pung chho zel nia a hriat thu leh lawmawm a tih thu Chief Minister chuan sawiin, khawvel hriata Mizote phochhuaktu pawimawh tak chu Mizo hnam leh ram hmangaihna (nationalism) a nih thu a sawi a, ram leh hnam hmangaihna chu uar zawka kalpui zel turin zirlaite chu a chah a. Hnam rilru pu tur leh Zohnahthlak hnam hrang hrangte inunauna leh inpumkhatna tura MZP hmalakna chu fakawm a tih thu a sawiin, MZP ten ‘Zofest’ ten an buatsaih thin chu lawmawma tih thu a sawi bawk a. Zohnahthlak te chu tlang dang leh mual hrang hrangah awm mahse, Mizoram chu Zofa zawng zawngte ‘Jerusalem’ a ni tih a sawi bawk.

MZP in HSLC Exam 2023-a Top 10-a lang Mizo zirlaite an chawimawina hun hi an pawl Vice President Andrew F. Lalramnghaka chuan kaihruaiin an President Lalnunmawia Pautu chuan HSLC a result tha tak neih chu hlawhtlinna a la nih loh thu leh hmabak an neihte theihtawp chhuaha bei turin a fuih a. “MZP-in hman atang tawha a dinna ngai reng, MLA election-ah hnamdang nupui pasal neite candidate a dah lo tur leh hnamdang Minister a dah lo tura Party hrang hrang a ngenna chuan tun hnaiah sawi a hlawh thar hle a. Hei hi ngaipawimawh turin party hrang hrang ka ngen nawn a. Hei hian ngaihpawimawh a hlawh lo a nih chuan, kan hnam kal zel turah hnam dang nupui pasal neih kawngah pawi tih lohna kan nei ang tih kan hlau a ni,” tiin tunhnaia Manipur-a buaina thleng chu MZP thuchhuah avanga lo thleng ni lovin, ruahman lawk a nih thu leh harsatna tawk an unau te tan MZP chu a tawp thlenga a din dawn thu a sawi bawk.

HSLC Exam 2023-a Top 10-a tling Mizote chawimawina hunah hian Top-10 a lang mi 17 zingah Mizo zirlai 14 te chawimawina hlan an ni a, heng zirlai 14 zinga 12 te hi hmei-chhia niin mipa 2 an tel bawk a, Zirlaite hi chawi-mawina thuziak leh tangkafai Rs. 5,000 bakah pangpar, MZP Sash, MZP Chanchinbu, Zofest-2022 Souvenir leh Lalhmachhuana Zofa lehkhabu ziah ‘Mizo History Khua’ tih te chu hlan an ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man