TV Programme kaltlanga zirtirna pe turin MoU ziak

Mizoram sawrkar-a School Education Department leh Rotary India Literacy Mission te chuan naupangte zirtirna TV Programme-a pekchhuah kawnga thawhdunna tur MoU chu nimin khan Secretary School Education Dr Lalzirmawia Chhangte Office Chamber-ah an ziak.

Ministry of Education, Govt. of India chuan State tinten zirna (education) atan bik liau liau a thlawna hman tur TV Channel pe turin a in ruahman mek a, hei hi zirlai tin te, hmun kilkhawr bera awm te, zirtirtu awm mumal lohna hmuna zirlai awmte pawhin zirna tha an dawn theihna atana ruahman a ni. He ruahmanna hi PM eVIDYA DTH TV Channel tih niin School Education Department, Govt. of Mizoram pawh TV channel chu enkawl tura tih a ni a. TV Programme te hi State tinin buatsaihin, BISAG, Gujarat atangin TV programme hi an rawn chhuah thin dawn a. He PM eVIDYA programme atan hian SCERT, Mizoram chu State Coordinating Agency atan ruat a ni.

He programme tihlawhtling tur hian Rotary India Literacy Mission (RILM) chuan NCERT Syllabus mil-a Learning content an siam sa te a thlawna hman theih turin Mizoram chu thawhpuiah an rawn sawm a, hun engemaw chen inbiakna a kal hnuah nimin, April 11, 2023 chawhnu dar 2:30 khan Secretary, School Education Department Office-ah he thawhhona thuthlung, MoU hi sign a ni ta a ni.

He programme hi Zoom hmangin RILM lam atangin Kamal Sanghvi, Chairman, RILM, Biswajit Ghosh, Chief Executive Officer leh Shekhar Mehta, President, Rotary International (21-22) ten an rawn hmanpui a. MoU hi School Education Department aiawhin Secretary Dr. Lalzirmawia Chhangte in a ziak a ni.