Mizoram KVI CEO hlui sum tih chingpen thubuai ah thiamloh chantir a ni

Aizawl District & Session Court-a Special Judge (Prevention of Corruption Act) Dr. HTC. Lalrinchhana chuan Mizoram KVI Chief Executive Officer (CEO) hlui Lalsawmzuala chu pawisa hman khawloh leh sawrkar lehkha pawimawh tih dik loh leh lehkha dik lo siam thuah thiamloh chantirin Vawiin-ah a hremna tur puan a ni ang.

Kum 2010-a khatihlaia PRISM President Vanlalruata leh General Secretary RL. Liantluanga te complaint thehluh atangin he thubuai hi intan a ni a, Anti-Corruption Bureau-ten thubuai an chhuina atangin dik hlel taka pawisa hman khawloh leh sawrkar lehkha pawimawh tih dikloh leh lehkha dik lo siama puhna te chu finfiah a nih avangin Section 409 IPC leh Section 477A IPC angin thiamloh chantir a ni a. Inbumna leh dawt hmanga pawisa a dawn thu leh amah emaw midang tu emaw bil tana pawisa a eiruk leh hlepruk thu-ah erawh dan anga finfiah zawh a nih loh avangin thiam a chang thung a, Lalsawmzuala hi Jail-ah dahluh nghal tura tih a ni.

Court thutluknaa tarlan a nih dan chuan Lalsawmzuala hian Saitual khua leh a chhehvela Fu chingtu mi 497 te ‘loan’ rulhna atana ‘Margin money’ an ruahman sak atanga la bang Rs. 9,08,369/- chu mamawh tul tul atan an pawhpen thu a pha lova. Mizoram KVI Board thutlukna la lovin Maruti Van te an lei bakah zanriah kilhona senso ilo atan te pawisa bang hi hman a ni a. Pawisa an lo hmang puk an tih hi rulh leh a ni chuang lova. Maruti Van an hralh leh hnua an hralhna pawisa an hman dan leh dahluhna pawh sawifiah a ni lova. Hei vang hian sawrkar mi leh sa ten dan leh kalphungin a tarlan ang ni loa dikhlel taka sumpai an lo tih chingpenna a nih angin section 409 IPC angin thiam loh chantir a ni.

Hei bakah hian Rural Employment Generation Programme (REGP) sum, cheng nuai 4 leh cheng nuai 5 dang, a vaiin cheng nuai 9 pawh pawhpen a ni a. Chumi atan chuan Lalsawmzuala hian MKVI CEO a nih angin Bill lem leh lehkha tul dang lem a siamtir teuh bawk a, hei hi sawrkar lehkha pawimawh tihchingpenna a nih avangin Section 477A IPC angin thiamloh chantir a ni bawk.

Kum 2008 kuma Ministry of Food Processing Industry, New Delhi atanga tanpuina sum Rs. 7,50,000/- an dawn atanga Rs. 88,950/- tichingpena puh a nihnaah erawh sum hman khawloh leh eiruk a nih finfiahna a awm loa ngaiin Lalsawmzuala hi Court chuan thiam a chantir thung a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar