Union MoS for DoNER in Mizoram rawn tlawhin Lengpui Airport leh Mamit District a tlawh

Union Minister of State for Development of North Eastern Region (DoNER) BL. Verma chuan zan khat riak turin nimin khan Mizoram a rawn thleng a, Lengpui Airport tihchangtlunna hna a enfiah bakah Mamit District a tlawh nghal a ni.

Union Minister BL. Verma hian nimin a Lengpui Airport a rawn thlen veleh Lengpui Airport tihchangtlunna hna, ‘Improvement/Upgradation of Operational/Non-Operational facilities of Lengpui Aiport’ thawh mek chu a hmunah a en a, Lengpui Airport VIP Lounge-a Meeting tawite neihah Minister chuan he hna chungchang a hriatduh hrang hrang project in a huam chin te, hna hrang hrang thawh mekte, hna an zawh beisei hun te PWD hotute a zawt a. PWD Engineer-in-Chief C. Lalchhuana chuan hna hi tluang taka thawh mek a nih thu leh December 2023-ah chuan zawh hman an beisei tih thu Union Minister a hrilh a. Minister chuan he hna zawh hun hi March 2023 atanga December 2023-ah pawhsei nimahse October 2023 chhunga zawhfel ni thei se tiin a duh thu a sawi a, hemi atan theihtawp chhuah turin PWD te chu a ngen a ni.

Meeting zawhah Minister chuan Lengpui Airport tihchangtlunna hna hrang hrang – Elevated Road, Departure Lounge, Baggage Make Up Area leh adangte a fangkual bawk a ni.

Hemi hnu hian Union Minister hian Mamit tlawhin Luangpawl Helipad-ah Mamit District Officials te'n an lo dawngsawng a, Mamit DC Conference Hall-ah Aspirational District hnuaia hmalakna hrang hrangte Review Meeting neih zui nghal niin District hmasawnna atana tha leh zung an senna-ah lawmthu a sawi a, Delta Ranking-ah hmasawnna hmuh tur awmte chu a lawmawm takzet a ni tiin tan la zel turin a chah a. Sawkar Laipui chuan North East tan hian theihtawp a chhuah zel a, Prime Minister ngei pawhin North East hi tum 50 lai a tlawh tawh tih sawiin, chu chuan North East hmasawnna atana rilru a senzia a entir a ni, a ti bawk.

North East Road leh Highway tihhmasawn nan sum tam tham tak sen tawh niin sen belh zel tura hmalak mek a nih thu pawh sawiin Minister chuan, tunhma-a inkalpawhna kawnga harsatna kan neihte sutkian mek zel a nih thu a tarlang a, Ministry hrang hrang hotute leh North East-a Chief Minister te thawhhona azarah hmasawnna chak taka kalpui mek zel a ni, a ti. Union Minister chuan Mamit District-in hmasawnna rahbi a neih theih nan Cooperative Societies te tha tichak turin a Ministry enkawl chuan theihtawp an chhuah thu a sawi a. Harsatna an neihte a hnena thlen hrehlo turin a chah bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man