Thla thar ah Healthcare ba pek theih beisei

Health Minister Dr. R. Lalthangliana chuan Healthcare pawisa ba engemaw zat chu thla thar-ah pekchhuah beisei a nih thu a sawi.

Nimin-a Aizawl Mizo Hnam Run Inkhawm ah Health Minister Dr. R. Lalthangliana chuan Covid-in kum hnih min nuai thu leh a rapthlak thu sawiin, Central sawrkar ngei pawhin harsatna an tawh thu a sawi a. “Kan term chanve deuhthaw harsatna in min tlakbuak chungin Health Department hnuaiah post 700 chuang la turin kan tifel hman a. Nunna chhan nana kan sum hman (budget-a awm lo) cheng nuai sing hnih a kai. Hma kan han la dawn chauh a, inthlanpui kan hmachhawn a lo hun leh ta mai hi a pawi hle” a ti a. “Healthcare pawisa cheng vbc 70 vel kan ba pawh thla thar-ah hi chuan budget-a cheng vbc. 60 kan dah atangin engemaw zat bill kan release ka beisei. ADB Project kan tifel a nih phei chuan Healthcare bill tang a awm tawh lo ang,” a ti bawk.

Dr. R. Lalthangliana chuan an sawrkar chuan an hmaa mite thiltih an chhunzawm thin tih pawh sawiin, “ZMC pawh kan hmaa miten an hawng a, tha takin kan chhunzawm. Covid Dedicated Medical College ni chungin MBBS pass thar 71% kan han neite hi thil ropui tak a ni,” a ti a. Zemabawk Cancer Superspeciality Hospital (cheng nuai 7000) tur atana an hmalakna pawh Central a paltlang ngai zawng zawng an tifel vek tawh tih a sawi bawk.