AAP in Zirna In ngaihsak loh tha an ti lo tih sawiin, Pawl 8 hnuailam in lehkhabu an la dawng kim lo niin an sawi

Aam Admi Party (AAP) zirlai pawl, Chhatra Yuva Sangharsh Samiti (CYSS) te chuan tun thlenga sawrkar School pawl 8 hnuailam ten zirlaibu an la dawng kim lo leh lei tur awm lo chu tha lo an tih thu sawiin, Mizoram sawrkar in zirna In a ngaihsak lo hle niin an sawi.

Nimin-a Aizawl Press Club-a thuthar thehdarhtute an kawmna ah AAP Zirlai pawl, Chhatra Yuva Sangharsh Samiti (CYSS) chuan Mizoram sawrkarin Zirna In an ngaihsak lo hle tih sawiin, 2023-24 Academic Session April 5, 2023-a tan a nih tawh laiin April 17-ah pawh sawrkar School naupang tam zawkin zirlaibu an la dawn loh piah lamah lei tur pawh a awm lo nia an sawi bakah kum kalta pawh khan zirlaiten hetiang chiah hian harsatna an tawk tawh tih an sawi a. School School thenkhatah phei chuan zirtirtu thahnem ngai ten zirlaibu hlui lakhawmin an sem nghe nghe nia sawiin, tunah hian zirlaibu thenkhat phei chu Press-ah an la print mek chauh niin an sawi. Sawrkarin lehkhabu a la neih kim loh nia an sawi te chu Class II-ah English leh Mathematics; Class III-ah Hindi, EVS leh English; Class IV-ah Hindi, EVS leh English; Class V-ah Hindi, EVS leh English; Class VI-ah Hindi, SS (kim lo) leh English; Class VI -ah Hindi, SS leh English leh Class VIII-ah Hindi te niin, School hrang hrangah lehkhabu dawn chen a inang lo niin an sawi bawk.

CYSS te chuan Sawrkar in naupangte zir tur lehkhabu leh mamawh pawh a peih hma in School tan hun a siam hmasa zawk nia sawiin, “Hei hian zirlaite leh zirna a ngaihsak loh zia leh an hmakhua a ngaih loh zia a tilang chiang hle a ni,” an ti a. “Sawrkarin zirtirtute training a pe tha lo a, an zirna puitu tur hmanrua pawh a pe tha lo a, khawi hmunah pawh hian zirna In chhia leh kalphung tha lo chu sawrkar School a ni vek,” an ti. Sawrkar tha chuan zirna a ngai pawimawh thin tih pawh sawiin, “Chuvangin Mizoram sawrkar hian kan zirlai puite mamawh a rang lama pe turin kan phut a, zirlaite min ngaihsak lo a, kan mamawh chi hrang hrangte hi min ngaihtuahpui duh lo a nih chuan AAP Mizoram chuan na takin hma kan la chhunzawm ang,” an ti bawk.