Mipui hi bum tlak kan ni tawh lo, khai chhuah tlak erawh kan ni - Lalsawta

Mizoram Pradesh Congress Committe (MPCC) President Lalsawta chuan, “Mipui hi bum tlak kan ni tawh lo, khai chhuah tlak erawh kan ni,” a ti.

Naktuk-a bye-election neihna tur Durtlang Leitan-a Vantlang Inkhawm nimin-a Congress Party in an buatsaih a hmanpuina ah MPCC President Lalsawta chuan Politics-a kan awm chhan a dik a tul tih sawiin, “Hmingthanna, hausakna, nawmsak leh lal kan duh vang a nih chuan heng hi ram kaihhruaina tura thil hlauhawm paih thlak vek tur a ni,” a ti. “Politics hi mi tlemte tana hausak leh khawsak nawm nan a ni lo, mi zawng zawng tan a ni tur a ni. He ram hian mi tak tak, hmangaih taka enkawltu a mamawh takzet a ni,” a ti a. He lei-ah hian Pathian lal ram din-a thlentir turin Lal Isua min zirtir tih sawiin, “Chutiang tur chuan kan tawngtai thin. Chu chu a taka thlentir turin ‘That loh theih lohna bawm’, System dik hi kan zuar a ni. Leitan South Kohhran pawhin ‘That Loh Theih Lohna Bawm’ kalpuiin khawtlang hmasawnna hna thawkin inkalpawhna kawngte an siam a, vengchhung vantlang hmunte an tifai thin, hei hi sawi a nuam a ni. In kaihhruaina dik an kal pui avangin Leng khua pawhin Health Care-te an kalpui thei,” a ti bawk.

MPCC President Lalsawta chuan, “Mipui hi bum tlak kan ni tawh lo, khaichhuah tlak erawh kan ni,” ti-a sawiin, mipuite chu kawng dikah hruai an duh tih a sawi a. “Tang Puihna hmangin mi rethei zawkte damkhawchhuahna kan siam sak dawn. Mizoram hi mi taimate tamna ramah siam hi kan thei a ni. Dinhmun in a zir loh avanga mahni In leh lo leh bungrua hralh ngai khawpa manganga awmte tan hian Congress party-in chhanchhuahna beihpui kan thlak dawn. Congress party hian sawrkar leh MLA a tlin ringawt tum ila cheng nuai nga sem hi kan tiam thei, sem pawh kan sem thei. Mahse, Mizoram mipuite tana sawrkar tha pek hi kan tum a ni zawk. Keimahni leh kan tu leh fate tan ram nuam leh tha zawk siam turin i thawkho ang u,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar