Sawrkar in Lunglei a ngaih-thah hran lo - Dy. CM

Deputy Chief Minister leh MNF Sr. Vice President Tawnluia chuan Lunglei khawpui chu MNF sawrkar in a ngaihthah hran lo tih sawiin, “A hma aia nasa in kan ngaihsak dawn a ni,” a ti.

MNF party in nimin-a Aizawl Mizo Hnam Run-a chhung Inkhawm an neih ah MNF Sr. Vice President leh Deputy Chief Minister chuan mipui hnena thuneihna tam zawk pek chu kum 2018 inthlan dawna MNF auhla a ni tih sawiin, Lunglei Municipal Council din chu MNF Manifesto tihhlawhtlinna a nih thu a sawi a. ‘Khawpui ah Municipal Council pek a ni ang’ ti-a an intiam thu sawiin, “Lunglei, Champhai leh Kolasib pawhin Municipality hi an dil a. MNF sawrkar hnuah Cabinet Meeting in a pawm a, Lunglei MC din a ni. Inthlan buatsaih a nih zawh hnuah LMC ruangam a rawn ding fel chho ta a, LMC-ah hian Chairman,Vice Chairman leh Executive Councillor pahnih an awm dawn,” a ti bawk.

Deputy Chief Minister chuan Lunglei khawpui chu MNF sawrkar in a ngaihthah hran lo tih sawiin, “LMC a kan tlin loh avangin kan ngaihthah dawn lova, a hma aia nasa in kan ngaih-sak dawn,” a ti a. LMC a thlantlin te chu thawhpui ah sawm nghalin, Dan in a phal chinah chuan chak takin theihtawp a chhuahpui dawn tih a sawi a, chumi tur chuan Councillor thlanthar te pawh lo inkau deuh se a duh thu sawiin, “Lunglei khawpui enkawlna kawnga tih tur a awm chuan Sawrkar angin kan tlanchhe dawn lo,” a ti bawk.

MNF Sr. Vice President chuan LMC a an nil chu MNF demna leh chauhna tur a ni lo tih pawh sawiin, “Politics-ah chuan san chang leh hniam chang a awm. Chunglamin kan harhna tur, kan hriat tur min hrilh tawh. Kan thawk zel anga, kum 2023-ah chakna kan chang leh ang,” a ti bawk.