Ramsa tawlhruk 995 Sahuan-ah dah a ni tawh

Mizoram Police leh thuneitu dang ten dan lova ramsa tawlhruk an man 995 chu Aizawl Zoological Park-ah dahluh an ni tawh a. Wildlife (Protection) dan tharah ramsa tawlhruk te chu Forest Department-in an man thei tawh dawn a ni.

Aizawl Zoological Park hotute sawi danin ramsa tawlhruk man hi July 7, 2019 atang khan Aizawl Zoological Park-ah dah tan a ni a, chung ramsa te chu Champhai, Kolasib, Khaw-zawl leh Mamit District-a Police leh Forest Department tangkawpten an mante bakah BSF leh Custom-in an mante an ni hlawm a. Sahuan a Exotic Animal dah tam ber chu Champhai District chhunga man niin ramsa chi hrang hrang 679 zet a tling a. Dan lova ramsa tawlh man, Sahuan a dahluhte hi Sava lam chi hrang hrang, Satel chi hrang hrang, Zawng chi hrang hrang, Laiking/Awle (reptile) lam chi te, Rul/Saphai lam chi bakah sazu lam chi an ni.

Zoological Park hotute chuan ramsa puitling chinho chu harsa lo taka an enkawl zel theih thu an sawi a, thenkhat erawh a note tak tak te, a tui atanga keu hlimte an la nih thin avangin an enkawl thiam lova, an chaw ei tur leh a enkawl dan tur an hriat loh avangin engemaw zat chu an thi niin an sawi.

Hetihlai hian Wildlife (Protection) Amendment Act, 2022 chu April 1, 2023 atangin hman tan a ni dawn a, he dan siamthat hnuaiah hian ramsa tawlhrukte chu Forest Department-in manin Court-ah an thlen thei tawh dawn a ni. Dan siamthat a nih hma kha chuan ramsa tawlhrukte Forest Department-in an duh thuin an man ngawt thei lova, Police nen tangduna manin Custom lamin Court-ah an thlensak a ngai thin a. Hemi avanga harsatna leh buaina awm thin te kha sutkian a ni dawn ta a ni.