Ngopa in rampum huap lawmman pakhatna dawng

India ram pum huap Gram Panchayat (Village Council) hna thawk thate inelna neih zawh takah Mizoram-a Ngopa Village Council chuan lawmman pakhatna an dawng.

Ngopa Village Council hian Nanaji Deshmukh Sarvottam Panchayat Satat Vikas Puraskar (NDSPSVP) lawmman pakhatna dawngin nimin khan New Delhi-ah India President Droupadi Murmu hnen atangin an dawng a, India ramah Gram Panchayat 2,55,000 aia tam mah awmin chung zingah chuan Ngopa Village Council hian India ram pum huap lawmman pakhatna hi an dawng a, he lawmman hian thuziak leh pawisafai cheng nuai 150 a keng tel a, nimin-a lawmman hlanna Plenary Hall, Vigyan Bhawan, New Delhi-a neih ah sawrkar laipui sawmna angin LAD Minister K. Lalrinliana pawh telin Department hotu ten an tawiawm bawk a ni.

Ngopa Village Council in lawmman an lak ‘Nanaji Deshmukh Sarvottam Panchayat Satat Vikas Puraskar’ hi Sustainable Development Goals 17 te tihhlawhtinna tura Localization of Sustainable Development Goals Theme (thupui) hrang hrang pakua (9) pumpuia titha lawmman a ni a. Localization of Sustainable Development Goals (LSDGs) Theme 9 te hi Poverty Free & Enhanced Livelihood; Healthy Panchayat; Child Friendly Panchayat; Water Sufficient Panchayat; Clean and Green Panchayat; Self Sufficient Infrastructure; Socially Secured Panchayat; Panchayat with Good Governance leh Women Friendly Panchayat tih te niin heng thupui hrang hrang hnuaia an hmalakna te hi enfiah a ni.

National Panchayat Awards lawmman semna hun nimin-a Delhi a neihah hian LAD Minister K. Lalrinliana chuan Sustainable Development Goals chungchanga State Sawrkar hmathlir (Vision 2030) leh chumi tihlawhtling tura hmalakna hrang hrang te sawiin, Mizoram in lawmman ropui tak a lak avangin Central Sawrkar hnenah pawh lawmthu a sawi a. Mizoram mai ni lo, India ram pumpuia Village Council 2,50,000 chuang zinga tehfung hrang hranga teh hnua Village Council tha ber an ni thei hi Mizoram-in a chhuang takzet tih sawiin, lawmman dawng theih tura thawhhona tha an nei chu laawmawm a tih thu a sawi bawk.

Village Council te enkawltu ber (Nodal Department) Local Administration Department chuan Ngopa Village Council ten India ram pum huap a Localization of Sustainable Development Goals Theme pakua (9) tihlawhtling tura hmala tha lawmman pakhatna an lak theih nana Rural Development Department leh line Department dangte nena thawhhona tha tak an neih avangin lawmawm an tih thu an sawi bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar